KINAMANAGPARABUR
Natan-ok ken mannakipagrikna a kinamasindadaan a mangbendision iti sabsabali babaen ti sibubulos ken naruay a panangted. Ti Hebreo a sao a na·dhivʹ, naipatarus a “naparabur” iti Isaias 32:8, naipatarus met a “sitatallugod” ken “natan-ok.” (Sal 51:12; Nu 21:18, Rbi8 ftn) Ti Griego a nombre a ha·ploʹtes (“kinamanagparabur” [2Co 8:2; 9:11]; “kinaparabur” [Ro 12:8]; “kinapasnek” [Efe 6:5]) addaan iti pamunganayan a kaipapanan a “kinasimple.” (2Co 11:3, Int) Ni Jehova a mismo ti personipikasion ti kinamanagparabur, Daydiay naan-anay a mangipaay iti amin a kasapulan dagiti natulnog a parparsuana “maitunos iti pagayatanna.” (1Jn 5:14; Fil 4:19) Tunggal naimbag a sagut ken naan-anay a rangkap aggapu kenkuana, agraman ti di maiggaman a sagut a kas iti sirib.—San 1:5, 17.
Indagadag ni Moises kadagiti padana nga Israelita a sukayenda daytoy nadibinuan a kualidad a kinamanagparabur, uray no iti panagpautang nga addaan tani. “Dika patangkenen ta pusom wenno agmetmet iti kabsatmo a napanglaw. Ta rebbeng a sipaparabur nga ukradem kenkuana ta imam . . . Di bumurong a mangtedka kenkuana, ket ti pusom rebbeng a saan a naimut iti panangtedmo kenkuana . . . Dayta ti makagapu a bilbilinenka, a kunak, ‘Rebbeng a sipaparabur nga ukradem ta imam iti naparigatan ken napanglaw a kabsatmo iti dagam.’”—De 15:7-11.
Kuna ti proverbio: “Ti naparabur a kararua [iti literal, ti kararua nga addaan iti ipaay a bendision a sagut] mapalukmegto a mismo [rumang-ay], ket daydiay sibubulos a mangsibug iti sabsabali isu sibubulos a masibuganto met.” (Pr 11:25) Kastoy ti panangyebkas ni Jesu-Kristo iti dayta: “Ad-adu ti kinaragsak iti panangted ngem iti panangawat.” (Ara 20:35) Kinunana manen: “Iyugaliyo ti mangted, ket mangtedto kadakayo dagiti tattao. Ibukbokdanto kadagiti saklotyo ti nasayaat a rukod, nasedsed, nayegyeg ken agliplippias. Ta ti rukod a pangrukrukodyo, pangrukoddanto met kadakayo.”—Lu 6:38.
Iti Kongregasion Kristiano. Dakamaten met ni apostol Pablo daytoy a pagaammo unay a kinapudno iti sabali pay a pamay-an: “Ti agmula a siiimut aganinto met a siiimut; ket ti agmula a siwawadwad aganinto met a siwawadwad.” Yantangay pudno daytoy, kunaen ti apostol, “tunggal maysa aramidenna koma kas iti inkeddengna iti pusona, saan nga iti nadagsen a rikna wenno mapilpilit, ta ti Dios ayatenna ti naragsak a manangited.” (2Co 9:6, 7) Itultuloy ni Pablo babaen ti panangipatuldona iti naindaklan nga ulidan ni Jehova iti kinamanagparabur saan laeng nga iti siwawadwad a panangipaayna iti bin-i iti managmula ken tinapay a pagtaraon no di ket kasta met iti panangpabaknangna iti kakabsat idiay Corinto “maipaay iti tunggal kita ti kinamanagparabur,” tapno agbalinda koma a managparabur iti sabsabali. Indeklara ni Pablo a dagita a kinaparabur nagbanag iti “ebkas ti panagyaman iti Dios.”—2Co 9:8-13.
Iti panangiparegtana itoy met laeng a nadiosan a kinamanagparabur, insurat ni Pablo kadagiti taga Roma (12:8): “Ti agibumbunong, aramidenna koma dayta a buyogen ti kinaparabur.” Kadagiti Hebreo (13:16) insuratna: “Mainayon pay, dikay lipatan ti panagaramid iti naimbag ken ti panangiranud iti bambanag iti sabsabali, ta babaen iti kakasta a sakripisio maay-ayo a naan-anay ti Dios.” Dagiti kongregasion idiay Macedonia ket naisangsangayan nga ulidan ti naparabur a panangted. Ti siraragsak pay ketdi a panangtedda iti “nalablabes ngem iti pudno a kabaelanda,” a nagikontribusionda manipud iti kinakurapayda, “pinaglaplapusananna ti kinabaknang ti kinamanagparaburda.”—2Co 8:1-4.
Maimutektekan koma a dagitoy a kasuratan maipapan ti kinamanagparabur ken kinaparabur saanda a supiaten wenno balusingsingen ti dadduma a kasuratan a mangkondenar kadagiti awanan panagyaman, nakudad, ken nasadut a tattao. Kas pagarigan, daydiay nasadut a saanto nga agarado iti nalam-ek a paniempo saan a maikari iti aniaman no makilimos inton tiempo ti panagani; ti agkedked nga agtrabaho saan a maikari iti kinamanagparabur ti sabsabali. (Pr 20:4; 2Te 3:10) Dagiti balo a babbai saan idi a mailista maipaay iti tulong malaksid no kualipikadoda. (1Ti 5:9, 10) Dagiti kontribusion ti kongkongregasion iti intero a Galacia, Macedonia, ken Acaya saan nga agpaay kadagidiay marigrigat a kameng dagiti pagano a managdaydayaw iti pangkaaduan, no di ket agpaay kadagiti “sasanto” nga agkasapulan.—1Co 16:1; 2Co 9:1, 2.