GESUR

1. Maysa nga Aramaeano a pagarian a kabeddeng ti rehion ti Argob iti Basan, iti daya ti Karayan Jordan. Ti Maacat ti kabangibangna iti amianan. Nupay dagiti immuna a panagparmek ti Israel dimmanon agingga iti Gesur, ti mismo a rehion ket saan a nakautibo. (De 3:14; Jos 12:1, 4, 5; 13:13) Nagkamang ni Absalom idiay Gesur, ti pagturayan ni Talmai nga apongna iti ina, kalpasan ti panangpapatayna ken Amnon a kabsatna iti ama. Sadiay a nagtalinaed bayat ti pannakapagtalawna iti tallo a tawen, agingga nga isu insubli ni Joab idiay Jerusalem. (2Sm 3:2, 3; 13:28-38; 14:23; 15:8) Iti maysa a naud-udi a tiempo, sinakup ti Gesur ken Siria ti adu a siudad ti Israel iti daya ti Jordan.​—1Cr 2:23.

2. Maysa a teritoria dagiti Gesurita iti makin-abagatan a Palestina, iti asideg ti teritoria dagiti Filisteo. (Jos 13:2; 1Sm 27:7-11) Saan nga espesipiko a naaramat ti porma a “Gesur” mainaig iti daytoy a disso.