FEATURE
Panagipadto da Elias ken Eliseo
NI Elias ket mammadto a nangikalikagum iti maysa a panangsubok iti kinadios idiay Bantay Carmelo. Ti makin-amianan a pagarian napagbalin a rinuker gapu iti panagdaydayaw ken Baal. Ngem situtured a kinarit ni Elias ti 450 a mammadto ni Baal a paneknekanda a ni Baal isu ti pudno a Dios. Awan naibunga ti nalagaw nga or-oras ti panagkararagda. Idin insimpa ni Elias ti sakripisiona, maulit-ulit a rinusepna iti danum, ket nagkararag ken Jehova. Idi a nagtinnag a dagus ti apuy manipud langit, nga inalun-onna ti sakripisio, ken dinilpatanna ti danum, inyebkas dagiti umili: “Ni Jehova ti pudno a Dios!” Iti kasta, imbilin ni Elias a magudas dagiti mammadto ni Baal.—1Ar 18:18-40.
Nupay kasta, nagbuteng ni Elias idi naammuanna nga isu isiksikat a papatayen ni Reyna Jezebel. Nagtalaw iti agarup 150 km (95 mi) agingga iti Beer-seba sa kalpasanna nagdaliasat iti sabali pay a 300 km (190 mi) agingga iti Bantay Sinai. Ni Jehova saanna a linaksid ni Elias iti temporario a kaawan ti turedna no di ket impasiguradona kenkuana nga adda pay trabaho a panagipadto nga aramidenna.—1Ar 19:1-18.
Ni Eliseo ti nangsuno ken Elias. Idi a ni Eliseo pinalikmutan dagiti karuahe a pakigubat ti Siria, addaan iti pammati tapno mabigbigna a dagiti ketdi buyot ti Siria ti napalikmutan—babaen iti sangabuyotan a karkaruahe dagiti anghel!—2Ar 6:15-17.
Mapa: Panagipadto da Elias ken Eliseo
Bantay Carmelo, makita iti likudan ti Baybay Mediteraneo. Ditoy ti nakaaramidan ti pangsubok nga apuy a nangpaneknek a saan a ni Baal no di ket ni Jehova ti pudno a Dios (1Ar 18:21-39)
Lugar ti Bantay Sinai (Horeb). Tinalawan ni Elias ti pungtot ni Jezebel iti agarup 450 km (285 mi) agingga iti daytoy a rehion (1Ar 19:1-18)
Buya manipud iti Tel Dotan. Ditoy a namilagruan a nakita ni Eliseo ken ti katulonganna a, nupay pinalikmutan ida ti puersa militar ti Siria, napno ti nakabambantay a rehion iti angheliko a “pakigubat a karkaruahe nga apuy” nga imbaon ni Jehova (2Ar 6:13-17)