DAYAG
Iti Hebreo a Kasuratan, ti sao a masansan unay a naipatarus a “dayag” ket ka·vohdhʹ, a kangrunaanna nga addaan iti kaipapanan a “kinadagsen.” (Idiligyo ti 1Sm 4:18, a sadiay ti nainaig a pangilasin a sao a ka·vedhʹ naipatarus a “nadagsen.”) Ngarud, ti dayag mabalin a tumukoy iti aniaman a mamagbalin a kasla nadagsen wenno nakaskasdaaw ti maysa a tao wenno banag, kas iti namaterialan a kinabaknang (Sal 49:16), saad, wenno pakasarsaritaan. (Ge 45:13) Ti Griego a katupag ti ka·vohdhʹ ket doʹxa, nga orihinal a kaipapananna ti “kapanunotan; pakasarsaritaan,” ngem iti Kristiano a Griego a Kasuratan kaipapananna ti “dayag.” Karaman kadagiti kaipapananna ket reputasion wenno “dayaw” (Lu 14:10), kinangayed (Lu 2:9; 1Co 15:40), ken ti banag a makaipaay iti dayaw iti makinkukua wenno nangaramid iti dayta (1Co 11:7).
Masansan a ti dayag dakamaten ti Kasuratan mainaig ken Jehova a Dios. No maipapan iti kaipapananna kadagitoy a kaso, ilawlawag ti Theological Dictionary of the New Testament, nga inurnos ni G. Kittel: “No mainaig iti tao, [ti ka·vohdhʹ] ipasimudaagna ti banag a mamagbalin kenkuana a nakaskasdaaw ken rumbeng a bigbigen, uray no dayta ket maibatay iti namaterialan a sansanikua wenno iti nakadkadlaw [a kinatan-ok wenno kinapateg]; no mainaig iti Dios, ipasimudaagna daydiay mamagbalin iti Dios kas makapasiddaaw iti tao.” (Impatarus ni G. Bromiley, 1971, Tomo II, p. 238) No kasta, ti dayag mabalin a tumukoy iti maysa a makapasiddaaw a pammaneknek iti mannakabalin-amin a bileg ti Dios. Mayanatup iti daytoy, ti makita a nailangitan a bambanag “idekdeklarada ti dayag ti Dios.” (Sal 19:1) Idiay Bantay Sinai, napaneknekan ti “dayag ni Jehova” babaen kadagiti nakabutbuteng a parangarang a kas iti “mangalun-on nga apuy.”—Ex 24:16-18; idiligyo ti 16:7, 10; 40:34.
Maipapan iti umuna a milagro ni Jesus, kunaen ti Biblia nga “imparangarangna ti dayagna.” (Jn 2:11) Ditoy, ti dayag tumukoy iti maysa a makapasiddaaw a pammaneknek iti namilagruan a pannakabalin a mangipabigbig ken Jesus kas ti naikari a Mesias. (Idiligyo ti Jn 11:40-44.) Iti sabali pay a gundaway, inkararag ni Jesus: “Ama, padayagennak iti sibaymo iti dayag nga adda kaniak idi iti sibaymo sakbay a naadda ti lubong.” (Jn 17:5) Inaramat ditoy ni Jesus daytoy a termino tapno tukoyenna ti natan-ok a kasasaad a tinagiragsakna idiay langit sakbay ti iyaayna ditoy daga. Kas sungbatna iti dayta a kararag, ni Jehova “impadayagna ti Adipenna, ni Jesus,” babaen ti panangpagungarna kenkuana ken panangisublina kenkuana idiay langit. (Ara 3:13-15) Iti panagbalbaliw ti langa ni Jesus, dagiti apostol nga adda iti dayta a pasamak “nakitada ti dayagna.” (Lu 9:29-32) Adda pakainaigan daytoy iti naarian a ‘kinatan-ok’ nga awaten ni Jesus iti ‘kaaddana’ iti pannakabalin ti Pagarian.—2Pe 1:16.
Nabagbagaan dagiti adipen ti Dios nga ‘aramidenda ti amin a bambanag a maipaay iti dayag ti Dios.’ (1Co 10:31) Maiparangarang ti dayag ti Dios babaen ti dayaw wenno panangidaydayaw a maipapaay kenkuana. Ti kababalin ti maysa mabalin a tignayenna ti sabsabali a ‘mangidayaw iti Dios.’ (Mt 5:16; 1Pe 2:12) Dagiti Kristiano a pudpudno nga agtignay maitunos iti panangiwanwan ni Jehova ‘mapagbalbaliwda . . . manipud iti dayag nga agturong iti dayag,’ nga agtultuloyda a rumang-ay iti panangyanninaw iti dayag ti Dios. (2Co 3:18) Iti sabali a bangir, rumbeng nga agannadtayo iti panangsapul iti dayag manipud kadagiti tattao, kas inaramid ti sumagmamano idi umuna a siglo. (Jn 12:42, 43) Agpadpada da Jesus ken apostol Pablo a nangipasdek iti nagsayaat nga ulidan iti saan a panangsapul wenno panangawat iti dayag manipud kadagiti tattao.—Jn 5:41; 8:50; 1Te 2:5, 6.