PANAGISULBONG

Ti pamay-an a panangisug-op iti rusing (tarubong, saringit) ti maysa a kayo a pagaammo nga agpataud iti nasayaat a bunga a maisilpo iti puon ti sabali a kayo nga agpatpataud iti nababbaba a kita ti bunga tapno mangpataud iti permanente a panagtipon. Masansan a naaramid ti panagisulbong tapno mapagtipon dagiti makapasayaat a kualidad agpadpada ti rusing (ti nasayaat a bungana) ken ti puon (ti kired ken kinalagdana). Kalpasan a makapagsaad dagiti naisulbong a sanga, nupay gumun-odda iti pannakataraon manipud naiduma a puon, mangpatauddanto iti isu met laeng a kita ti bunga a kas iti kayo a nakaalaanda.

Ni apostol Pablo, iti panagsuratna kadagiti Kristiano idiay Roma, indiligna dagiti di Judio a Kristiano kadagiti sanga ti maysa nga atap nga olibo a naisulbong iti olibo ti minuyongan tapno masuktan dagiti nainkasigudan a sanga a nasip-ak. Kunana a ti kasta a pamay-an iti panangisulbong ket “maikaniwas iti nakaisigudan.” Dagiti nainkasigudan a sanga katupagda dagiti Judio a, gapu iti kaawan ti pammatida, napukawda ti gundawayda a mairaman kadagidiay nakalinia maipaay iti nailangitan a Pagarian ti Mesias. Ti pannakaisulbong dagiti sanga ti atap nga olibo, wenno dagiti di Judio a Kristiano, iti olibo ti minuyongan tapno masuktan dagiti “nainkasigudan a sanga” ket saan a rason tapno maaddaan dagidiay a Gentil kadagiti nangato a kapampanunotan, ta babaen laeng iti pammati a mataginayonda ti saadda. Kasta met, ti panangisulbong kadagiti sanga manipud iti atap nga olibo iti olibo ti minuyongan iladawanna ti permanente a panagtipon a naibanag iti nagbaetan dagiti Judio ken dagiti Gentil kas pada a kamkameng ti “Israel ti Dios.”​—Ro 11:17-24; Ga 3:28; 6:16; idiligyo ti Jn 15:1-6; kitaenyo ti OLIBO.