HARA

Maysa a disso a nangipanan ni Ari Tilgat-pilneser (Tiglat-pileser III) ti Asiria kadagiti inyakarna a kautibo nga Israelita. (1Cr 5:26) Dagiti umasping a pannakatukoy maipapan ti naud-udi a panangidestiero dagiti Asirio (2Ar 17:6; 18:11) salaysayenda a naipan dagiti Israelita kadagiti “siudad dagiti Medo” (Masoretiko a teksto) wenno iti “bambantay dagiti Medo.” (LXX) Pagarupen ti adu nga eskolar a mabalin nga umiso ti nailanad iti Septuagint ket kunaenda nga iti 1 Cronicas 5:26 ti “Hara” (Ha·raʼʹ, nalabit Aramaiko a porma ti Hebreo a sao maipaay iti “bantay” [har]) nagbalin a piho a nagan idi a saan nga inggagara a naikkat ti sasao a “dagiti Medo.” No umiso daytoy a panangipapan, ti “Hara” ket mabalin a nayawag iti “bambantay dagiti Medo” iti daya ti ginget ti Karayan Tigris. Nupay kasta, ipapan ti dadduma a ti Gozan iti 2 Ar-ari 17:6 ken 18:11 ket maysa a lugar (kas agparang iti JB, RS) saan a karayan ken patienda a ti “Hara” ket mabalin a lokal nga awag idi iti maysa a kabambantayan a rehion idiay Turkia.