HELCAT

[Napalanas a Disso].

Siudad a karaman kadagiti nailista a beddeng ti tribu ni Aser (Jos 19:24, 25, 31), naituding idi agangay kadagiti Gersonita kas siudad dagiti Levita. (Jos 21:27, 30, 31) Agparang dayta iti 1 Cronicas 6:75 iti naiduma nga ispeling, Hukok. Pattapatta laeng ti ayanna. Kunaen ti sumagmamano nga isu dayta ti Khirbet el-Harbaj (Tel Regev), 18 km (11 mi) iti abagatan ti Acco ken asideg iti arisadsad ti kabambantayan ti Carmelo. Ti The Illustrated Bible Dictionary nga inurnos ni J. D. Douglas (1980, Tomo 2, p. 634) ibilangna a “nalabit nasaysayaat pay, ti Tell el-Qasis,” agarup 9 km (5.5 mi) iti abagatan ti Khirbet el-Harbaj, nga adda iti pagserkan ti Ginget ti Jezrael. Yantangay ti il-ili ti Hali ken Beten (a nadakamat kalpasan ti Helcat iti listaan iti Josue 19:24-26) ket kaaduan a maibilbilang nga adda iti makin-abagatan a paset ti Tanap ti Acco, ti panangikuna nga isu met laeng dayta ti Tell el-Qasis (Tel Qashish) ipasimudaagna nga adda dayta iti pagbedngan a mangrugi iti kaadaywan nga abagatan a daya a nagsulian ti Tanap ti Acco, imbes a daydiay mangrugi iti amianan ken agturong iti abagatan. Ngem tapno masinunuo daytoy, kasapulan a maammuan ti ayan ti sabali pay nga il-ili.