HEMAN

1. Maysa kadagiti uppat a masirib a lallaki a linab-awan ni Ari Solomon ti siribda. Da Heman, Calcol, ken Darda ket naawagan kas “annak ni Mahol,” sasao a pagarupen ti dadduma kas tumukoy iti maysa a gunglo dagiti sumasala wenno musikero. (1Ar 4:31) Iti 1 Cronicas 2:3-6, nadakamat ni Heman kas kaputotan ni Juda babaen ken Zera. Iti superskripsion ti Salmo 88, isu naawagan iti “Ezrahita,” a nabatad a sabali laeng a termino maipaay iti “Zeraita.”​—Kitaenyo ti EZRAHITA.

2. Anak ni Joel ken apoko ni mammadto Samuel a kameng ti pamilia dagiti Cohatita; maysa a Levita a kumakanta ken nalaing nga agaramat iti piangpiang, bayat ti panagturay da David ken Solomon. (1Cr 6:33; 15:17-19; 2Cr 5:11, 12) Kas ama ti 14 nga annak a lallaki ken 3 a babbai, indauluanna ti pamiliana iti panagkanta iti balay ni Jehova. Nupay kasta, isu a mismo, agraman da Asaf ken Jedutun, ket adda iti direkta a panangiwanwan ti ari.​—1Cr 25:1, 4-6.