PADINGPADING
Ti paset ti bagi nga adda iti abay ti patong agingga iti likud. Ti Hebreo a sao a moth·naʹyim isu ti kadawyan a naipatarus a “padingpading” wenno “lomo,” nupay adda sabali a Hebreo a sao nga espesipiko unay a kaipapananna ti “padingpading.”—Kitaenyo ti LOMO.
Masansan a kadagiti padingpading ti pakaikabilan ti sinturon, nangnangruna kadagiti soldado a nangisalikad iti sikakaluban a kampilan wenno punial iti uneg ti sinturonda wenno nangikabilda iti kaluban ti kampilan iti sinturonda. (2Sm 20:8; Ne 4:18) Inkabil ti sekretario ti tinterona kadagiti padingpadingna, a naisalikad iti sinturonna wenno barikesna. (Eze 9:2) Maibarikes idi ti tinakpil kadagiti padingpading kas tanda ti panagleddaang.—Ge 37:34; Am 8:10.
Sakbay a sanguen ti maysa a tao ti aniaman a kita ti nadagsen nga aramid, ‘bariksanna dagiti padingpadingna,’ masansan a babaen ti panangguyodna kadagiti gayadan ti labonglabong ken aguy-uyaoy a kawesna iti nagbaetan dagiti sep-angna sana isuksok iti barikesna. Sibabarikes dagiti padingpading dagiti Israelita idiay Egipto idi kinnanda ti Paskua, a nakasaganada a rummuar iti dayta a daga. Sibabarikes met idi dagiti padingpading ni Elias a nakasagana nga agtaray nga umun-una ngem iti karuahe ni Acab.—Ex 12:11; 1Ar 18:46.
Piguratibo a Pannakausar. Dagiti piskel kadagiti padingpading ket makatulongda unay iti panangbagkat ken panangawit kadagiti nadagsen a karga; ngarud mayanatup ti sasao iti Salmo 66:11, “Nangikabilka iti padagsen kadagiti padingpadingmi.” Ti panangpapigsa kadagiti padingpading ipasimudaagna ti panagsagana nga agpuersa, kas koma no makidangadang. (Na 2:1) Ti naimbag nga asawa a babai naikuna a bariksanna dagiti padingpadingna iti pigsa ken pakirdenna dagiti takiagna tapno itungpalna dagiti nakaad-adu a trabahona a pagimbagan ti sangakabbalayan. (Pr 31:17) Iti kasumbangirna, dagidiay napakapsutan gapu iti buteng, rigat, wenno pannakaabak ket naikuna nga agkalogkalog, wenno agkinkintayeg, dagiti padingpadingda. (Sal 69:23; Eze 21:6; 29:7) Ti panangbukra iti barikes ti padingpading ti ar-ari kaipapananna ti panangikkat iti pigsada.—Isa 45:1.
Nagsao ni Jehova maipapan iti panagbalin ti balbalay ti Israel ken Juda a kasla sinturon kadagiti padingpadingna a nakaas-asidegda unay kenkuana, iti kasta agbalinda a pakaidaydayawanna ken umimnasda. (Jer 13:11) Nailadawan ni Jesu-Kristo kadagiti padto kas agturturay buyogen ti kinalinteg a kasla pannakasinturon dayta dagiti padingpadingna ken buyogen ti kinamatalek a kasla pannakasinturon met dayta dagiti lomona. Mabalin a kaipapanan daytoy nga amin dagiti panangaramat ni Jesu-Kristo iti pannakabalinna ket maitunos a kanayon iti kinalinteg ken kinamatalek. Ti nagsayaat a kualidad a kinalinteg ti mangpatibker kenkuana iti panagtignayna a kas Ukom a dinutokan ni Jehova, no kasano a ti sinturon ket mangpatibker met.—Isa 11:1, 5.