HOFRA

[manipud Egipcio, kaipapananna ti “Agibtur ti Puso ni Ra [ti dios-init]”].

Iti Griego a Septuagint (Jer 51:30, a katupag ti 44:30 iti kaaduan a bersion), isu naawagan iti Ou·a·phreʹ. Ni Faraon Hofra ket inawagan ni Herodotus iti Apries. Naipagarup a nagturay ni Hofra iti 19 a tawen. Nupay kasta, sigun ken Herodotus (II, 161), nagturay ni Hofra iti 25 a tawen.

Kalpasan a dagiti Judio nagkamangda idiay Egipto idi 607 K.K.P., kinuna ni Jehova babaen iti ngiwat ni Jeremias: “Adtoy iyawatko ni Faraon Hofra, ti ari ti Egipto, iti ima dagiti kabusorna ken iti ima dagidiay mangsapsapul iti kararuana.” (Jer 44:1, 26, 30) Pagilasinan daytoy iti umad-adani idin a didigra a dumteng kadagiti Judio nga agnanaed idiay Egipto. (Jer 44:29) Sigun ken Herodotus (II, 161-169), nangyussuat ni Hofra (Apries) iti panagdaliasat nga agturong idiay Cirene tapno tumulong kadagiti taga Libya maibusor kadagiti Griego idi maikanem a siglo K.K.P., ngem nagbanag daytoy iti pannakaabakda. Immalsa kenkuana dagiti buyotna ket insaadda ni Ahmose II (Amasis) kas karibal nga ari. Uray pay kasta, napangas unay ni Hofra ta “patienna nga uray ti maysa a dios saanna a maikkat isuna iti tronona.” Nupay kasta, naibalud ket kamaudiananna napapatay babaen iti pannakabekkel.