HOR
[Heb., Hor ha·harʹ, “Hor a Bantay”].
1. Ti bantay iti asideg ti Mosera iti ketegan ti Edom a sadiay ti nakatayan ni Aaron sakbay unay a sumrek ti Israel iti Naikari a Daga. Immuli iti Bantay Hor da Aaron, Moises, ken anak ni Aaron a ni Eleazar bayat a siiimatang ti gimong ti Israel. Idi addadan iti tuktok ti bantay, inikkat ni Moises dagiti kawes ni Aaron kas padi ket inkawesna dagita ken Eleazar. Kalpasan daytoy, natay ni Aaron, ket nalabit sadiay nga intabon da Moises ken Eleazar.—Nu 20:22-29; De 32:50; idiligyo ti De 10:6.
Sigun ken historiador Josephus, ti Bantay Hor ket maysa kadagiti natayag a bantay a nangpalikmut iti Petra a siudad ti Edom. (Jewish Antiquities, IV, 82, 83 [iv, 7]) Kadawyan a maikunkuna a nainaig dayta iti Jebel Harun (kaipapananna ti “Bantay ni Aaron”), a maysa a nalabaga a bimmato a bantay a dua ti tapawna, nga agtayag iti agarup 1,460 m (4,790 pie) ken adda iti nakurang a 5 km (3 mi) iti laud nga abagatan-a-laud ti Petra. Nupay kasta, kasla saan a mayataday ti Jebel Harun iti panangiladawan ti Biblia a ti Israel naggapu iti Cades (Cades-barnea) nga agturong iti Bantay Hor “iti lindoras ti daga ti Edom.” (Nu 33:37-39, 41) Ti Jebel Harun awan iti ketegan ti Edom, no di ket adda iti uneg dayta a pagilian. Ngarud, tapno madanon ti Israel daytoy ibagbagada a lugar, kayatna a sawen a simrekda iti teritoria ti Edom. Ngem saan a mabalin a mapasamak daytoy, ta sakbay pay daytoy addan pasamak a saan a napalubosan dagiti Israelita a lumasat iti Edom. (Nu 20:14-22; De 2:5-8) Gapuna, umanamong ti adu nga eskolar a mabalin nga isu dayta ti naiputputong ken narangkis a Jebel Madurah (Har Zin [Hor Ha Har]), a maysa a puraw a tisa a bantay nga agarup 40 km (25 mi) iti abagatan a laud ti Natay a Baybay, ken agarup 60 km (37 mi) iti daya nga amianan-a-daya ti Cades.
2. Maysa a bantay a pannakabeddeng ti Canaan iti amianan. (Nu 34:7, 8) Saan a masigurado no ania ken sadino dayta. Patien ti dadduma nga eskolar a daytoy a Bantay Hor (Heb., Hor ha·harʹ) ket mabalin nga isu met laeng ti Bantay Hermon. Kunaen ti dadduma a mabalin a dayta ti pangawag iti intero a Kabambantayan ti Libano wenno iti maysa a nalatak nga alimpatokna.