HUSAI

[mabalin a napaababa a porma ti Hasabias, a kaipapananna ti “Imbilang (Inkabilangan) ni Jehova”].

Nasungdo nga Arquita a gayyem ni Ari David a timmulong a mangkeltay iti panagrebelde ni Absalom. (1Cr 27:33) Ni Husai, a naray-ab ti nagayad a pagan-anayna ken narugit ti rabaw ti ulona, sinabetna ti agtaltalaw nga ari iti Bantay dagiti Olibo. Tinungpalna ti singasing ni David nga agsubli iti siudad, aginsusungdo ken Absalom, ikagumaanna a paayen ti pammatigmaan ni Ahitofel, ken kanayon a pakaammuanna ni David babaen kada Sadok ken Abiatar a papadi. (2Sm 15:30, 32-37) Nagatap ni Absalom idi damo, ngem nagballigi ni Husai a manggun-od iti panagtalekna. (2Sm 16:16-19) Idi kiniddaw ni Absalom ti kapanunotan ni Husai maipapan iti kasayaatan a namilitariaan nga estratehia, nagsao ni Husai iti maisupadi ken Ahitofel ket nangirekomenda iti tignay nga iti kinapudnona mangipaay ken David iti tiempo a makapagorganisar. Indatag ni Husai ti kapanunotanna iti pamay-an nga, iti panangmatmat ni Absalom ken dagiti kakaduana, agparang a nasaysayaat ngem iti balakad ni Ahitofel a rumaut a madagdagus. Kalpasanna, pinakaammuan ni Husai dagiti papadi maipapan iti napasamak. (2Sm 17:1-16) Ti pammatigmaan ni Husai pinaayna ti pammatigmaan ni Ahitofel, kas iti dinawat ni David iti Dios, ket iti kasta ‘nangyeg ni Jehova iti didigra ken Absalom.’​—2Sm 15:31; 17:14; kitaenyo ti GAYYEM (Gayyem [Kadua] ti Ari).