IBLEAM

[mabalin a nagtaud iti sao a kaipapananna ti “alun-onen”].

Maysa a siudad iti teritoria ti Isacar ngem daytoy agraman dagiti sakupna nga ili ket naituding iti Manases. Nupay kasta, dagiti Manasesita saanda a nabaelan paksiaten dagiti Canaanita manipud Ibleam. (Jos 17:11-13; Uk 1:27) Agparang a ti Ibleam isu met laeng ti Bileam iti Manases a naited kadagiti Cohatita a Levita. (1Cr 6:70) Ngem iti pumadpada a teksto a mangdakdakamat kadagiti siudad dagiti Levita iti teritoria ti kagudua a tribu ni Manases (Jos 21:25), nailanad ti “Gat-rimmon” imbes a “Bileam” wenno “Ibleam.” Kaaduanna a maikunkuna a biddut daytoy ti eskriba, a ti “Gat-rimmon,” ti nagan ti maysa a siudad iti Dan, nalabit di inggagara a naulit manipud bersikulo 24.

Naikuna a ti Ibleam isu ti Khirbet Belʽameh, agarup 18 km (11 mi) iti abagatan nga abagatan-a-daya ti Megiddo.

Iti asideg ti Ibleam, nakabil ni Ari Ocozias ti Juda sigun iti panagbilin ni Jehu, ket natay idi agangay. (2Ar 9:27) Idi agangay, nagpatingga ti dinastia ni Jehu idi a ni Zacarias napapatay idiay Ibleam (sigun iti Lagardian nga edision ti LXX).​—2Ar 15:10-12, JB, NW, RS.