ITAMAR

[mabalin nga, Ama (wenno, Kabsat a Lalaki) ti Kayo a Palma].

Ti maikapat a nailista kadagiti annak ni Aaron. (Ex 6:23; Nu 26:60; 1Cr 6:3) Kalpasan nga immatonanna ti pannakaimbentario dagiti material iti tabernakulo, ni Itamar, agraman ti ama ken kakabsatna, ket naisaad kas padi iti seremonia a naibinsabinsa iti Exodo 29. (Ex 28:1; 38:21; 40:12-15) Idi a napapatay kamaudiananna ti dua nga in-inauna a kakabsatna, da Nadab ken Abihu, gapu iti panangidatonda iti “di mayalubog nga apuy,” naibaga ken Itamar ken iti maikatlo a kabsatna a ni Eleazar a saanda ida a pagleddaangan. Idi agangay, immawat da Itamar ken Eleazar iti dakdakkel a bingay kadagiti annongen kas papadi bayat a progresibo nga imbalabala ni Jehova dagitoy. (Le 10:1-20) Napagbalin ni Itamar a manangaywan iti nadumaduma a panagserbi iti tabernakulo a naipaannong kadagiti Gersonita ken kadagiti Merarita.​—Nu 3:2-4; 4:28, 33; 7:8.

Nagtultuloy kas papadi dagiti kaputotan ni Itamar, ket kabayatan ti panagturay da Saul, David, ken Solomon, dagiti kameng iti balay ni Eli a kaputotan ni Itamar temporario a nagannongda kas nangato a padi. Idi inorganisar ni David ti panagserbi iti templo, 8 kadagiti 24 a benneg ti papadi ti naggapu iti balay ni Itamar. (1Cr 24:1-6; 1Sm 14:3; 22:9; kitaenyo ti NANGATO A PADI.) Naipasalista met ti annak ni Itamar a nairaman kadagiti balay dagiti amma ti Israel kalpasan ti pannakaidestiero idiay Babilonia.​—Esd 8:2.