JABES-GALAAD
[mabalin a, Namagaan a Disso ti Galaad].
Kadaanan nga ili iti teritoria ti tribu ni Gad, iti daya ti Jordan. Saan a masigurado ti eksakto nga ayanna, nupay patien ti kaaduan nga eskolar nga adda dayta iti daya ti Jordan iti aglawlaw ti Wadi Yabis (Jabes), agarup 35 km (22 mi) iti abagatan ti Baybay ti Galilea.
Ti damo a pannakadakamat ti Jabes-galaad ket idi kaaldawan ti Uk-ukom, mainaig iti pannusa a naipakat iti kabangibang a tribu ni Benjamin gapu iti panangpanuynoyna iti nakaro nga imoralidad. (Uk 21:8) Iti dayta a pasamak, idi gistay tinalipupos dagiti Israelita ti intero a tribu ni Benjamin (600 laeng a lallaki ti nakatalaw), natakuatan nga awan uray maysa a lalaki manipud Jabes-galaad ti nakiraman iti panangipakat iti daytoy nainkalintegan a pannusa. Gapuna, naikeddeng a rumbeng a mapapatay ti tunggal lalaki, babai, ken ubing iti Jabes-galaad, malaksid kadagiti birhen. Ti 400 a birhen a nailiklik naitedda kalpasanna kas assawa dagiti pugante a Benjamita tapno malapdan ti pannakaungaw ti tribu.—Uk 20:1–21:14.
Agarup tallo a siglo kalpasanna, idi tiempo nga agkidkiddaw ti intero nga Israel iti tao nga ari a kas iti dadduma a nasion, impangta dagiti Ammonita a suatenda ti makannawan a mata ti tunggal lalaki nga agnanaed iti Jabes-galaad. Naikkat laeng daytoy a pangta idi nangummong ni Saul iti puersa a 330,000 ken pinaksiatna dagiti Ammonita. (1Sm 11:1-15) Uppat a pulo a tawen kalpasanna, dagiti Filisteo inabakda dagiti Israelita ket imbitinda dagiti awanan ulo a bangkay ni Saul ken ti tallo nga annakna iti pader ti publiko a plasa iti uneg ti Bet-san. Apaman a nangngegda daytoy a pannakaibabain, nangaramid dagiti maingel a lallaki ti Jabes-galaad iti natured a panangrubbuot iti rabii nga iti dayta inikkatda dagiti bangkay, inyegda ida idiay Jabes-galaad, pinuoranda dagiti bagi, ken intabonda dagiti tulang iti nadayaw a pamay-an. Kalpasanna nagayunarda iti pito nga aldaw.—1Sm 31:8-13; 1Cr 10:8-12.
Kas kabbaro a napulotan nga ari ti Juda, nangipatulod ni David iti komendasion ken indawatna a mabendisionan koma dagiti umili ti Jabes-galaad gapu iti panangipakitada iti naayat a kinamanangngaasi iti napapatay a napulotan nga ari ti Israel. (2Sm 2:4-7) Idi agangay, impaiyeg ni David dagiti tulang da Saul ken Jonatan manipud Jabes-galaad ket intabonna dagita iti disso a pagitabonan ti pamilia ni Saul iti teritoria dagiti Benjamita.—2Sm 21:12-14.