JEHOIADA

[Maammuan Koma ni Jehova].

1. Ama ti Benaias a gistay kanayon a nadakamat kas “Benaias nga anak ni Jehoiada,” ken maysa kadagiti nabileg a lallaki ni David ken panguluen met iti buyot ni Solomon. (2Sm 23:8, 20, 22, 23; 1Ar 2:35) Ni Jehoiada ket nainaig met iti kinapadi, yantangay naawagan iti “panguluen a padi.” Natukoy kas “panguluen ti annak ni Aaron” ken karaman kadagidiay kimmappon ken David idi nagbalin nga ari iti intero nga Israel idiay Hebron.​—1Cr 27:5; 12:27, 38.

2. Maysa a manangbalakad ni Ari David; agparang nga apoko ti Num. 1.​—1Cr 27:33, 34.

3. Maysa a nangato a padi idi tiempo da Jehoram, Ocozias, Athalia, ken Jehoas. Nagbalin nga asawa ni Jehoiada ti anak a babai ni Ari Jehoram a ni Jehoseba, a naawagan met iti Jehosabeat (ti kakaisuna a nailanad a pannakiasawa ti maysa a nangato a padi iti naarian a pamilia). Ti kangrunaan a makagapu a nagdindinamag ni Jehoiada ket ti panangduprakna ken Athalia ken panangitandudona iti pudno a panagdaydayaw idiay Juda. Idi napapatay ti agturturay nga anak ni Athalia a ni Ocozias, pinapatay ni Athalia ti amin a nabatbati a naarian nga annak sana insaad ti bagina iti trono. Nupay kasta, ti kabsat ni Ocozias a ni Jehoseba, nupay mabalin a saan nga anak ni Athalia, innalana ti maladaga a ni Jehoas nga anak ni Ocozias ket inlemmengna iti uneg ti innem a tawen. Iti maikapito a tawen, nagun-od ni Jehoiada ti suporta dagiti Levita, dagiti panguluen dagiti Cariano a para-guardia ken dagiti tumataray, kasta met dagiti pannakaulo dagiti balay ti amma ti Israel. Isu nga idin, inruarna ni Jehoas sada inwaragawag nga ari. Kalpasanna, imbilin ni Jehoiada a mairuar ni Athalia iti arubayan ti templo ket mapapatay.​—2Ar 11:1-16; 2Cr 22:10–23:15.

Kalpasan dayta, saan a nagtaktak ni Jehoiada a mangidur-as iti panagdaydayaw ken Jehova. Pinabarona manen ti tulag ti pannakirelasion ti Israel ken Jehova, iti kasta rinebba dagiti umili ti balay ni Baal ken inikkatda dagiti altar, ladladawan, ken papadina. Kalpasanna, insubli amin ni Jehoiada dagiti panagserbi iti templo. Adda nagsayaat unay nga impluensiana iti biag ni Jehoas. Ti templo ket tinarimaan da Jehoiada ken ti ari sa nagaramidda iti nadumaduma nga aruaten maipaay iti balay ni Jehova. Idi natayen ni Jehoiada iti edad a 130, naitabon iti nakaitaneman ti ar-ari kas naisangsangayan a pammadayaw kenkuana “agsipud ta nakaaramid iti naimbag iti Israel ken iti pudno a Dios ken iti balayna.” Nakalkaldaang ta ti nasayaat nga impluensiana ket natay a naikanunong kenkuana, gapu ta idi agangay immimdeng ni Jehoas kadagiti prinsipe ti Juda ket simiasi ken Jehova, nga imbilinna pay ti pannakapapatay ti anak ni Jehoiada a ni Zacarias, ta nangipaay iti pannubngar kadagiti di matalek nga umili.​—2Ar 11:17–12:16; 2Cr 23:16–24:22.

4. Maysa a padi a sinukatan ni Sofonias nga anak ni Maasias idi panawen ni Jeremias.​—Jer 29:24-27.