JEHONADAB

[Ni Jehova ket Madadaan (Natan-ok; Naparabur)], Jonadab [napaababa a porma ti Jehonadab].

Iti Hebreo a teksto ken iti adu a patarus iti Ingles, mapagsinsinnukat a maar-aramat dagitoy a dua nga ispeling maipaay kadagiti dua a tattao a kastoy ti naganda.

1. Kaanakan ni David ken anak ni Simeah a kabsatna. Ni Jehonadab ket “masirib unay a lalaki” ngem nasikap. Inuyotanna ni Amnon nga anak ni David tapno ipudnona ti panaggartemna ken Tamar a kabsatna iti ama. Kalpasanna, nangisingasing ken Amnon iti maysa a gakat, nga iti dayta ni Amnon ginundawayanna ni Tamar. Ni Absalom, a kabsat ni Tamar iti ama ken ina, nagibales ket pinapatayna ni Amnon. Ket idi dimteng ken David ti damag a ni Absalom pinapatayna amin nga annak ti ari, impasigurado ni Jehonadab a ni laeng Amnon ti natay. (2Sm 13:3-5, 14, 22, 28-33) Mabalin nga isu ti “Jonatan” iti 2 Samuel 21:21 ken iti 1 Cronicas 20:7.

2. Anak ni Recab; kadua ni Ari Jehu. Saan a naiparparna a nasabetna ni Jehu, ta mismo a ni Jehonadab ti ‘immay simmabet kenkuana,’ ket kalpasanna inawatna ti pamendision ni Jehu. Ipakita dagiti simmaganad a napasamak a naan-anay nga immayon ni Jehonadab iti determinasion ni Jehu a mangtalipupos iti panagdaydayaw ken Baal iti daga ti Israel. Iti tunggal ibaga ni Jehu, dagus nga umanamong ni Jehonadab. “Ti kadi pusom nalinteg a maibuyog kaniak?” inyimtuod ni Jehu. Insungbatna, “Nalinteg.” “Iyawatmo kaniak ta imam,” kinuna ni Jehu; ket inyawat ni Jehonadab ti imana. Iti karuahe ni Jehu, naibaga ken Jehonadab, “Makikuyogka kaniak ket kitaem ti saanko a panangpanuynoy iti pannakirinnisiris ken Jehova,” ket imparangarangna manen ti kinamasindadaanna. Kamaudiananna, idi nakagtengda idiay Samaria ken naummong aminen dagiti managdaydayaw ken Baal, saan a timmallikud ni Jehonadab no di ket kinuyogna ni Jehu a sumrek iti balay ni Baal ken nagtalinaed iti sibayna kabayatan ti napasamak a pananggudas. Iti dayta met laeng a gundaway, imparangarang ni Jehu ti naan-anay a panagtalekna ken Jehonadab.​—2Ar 10:15-28.

Iti agarup 300 a tawen kalpasan dayta, kas imbilin ni Jehova, dinakamat ni Jeremias dagiti kaputotan ni Jehonadab (dagiti Recabita) kas ulidan iti panagtulnog iti bilbilin daydi amada, ket maisupadi daytoy iti panagsukir dagiti umili ti Juda ken Jerusalem iti linteg ti Dios. Binilin idi ni Jehonadab dagiti Recabita nga agnaedda kadagiti tolda, saanda nga agimula iti bin-i, saanda nga agmula iti kaubasan, ken saanda nga uminum iti arak. Idi nangidiaya kadakuada ni Jeremias iti arak, nagkitakitda, a dinakamatda daydi bilin ni Jehonadab nga inapoda. Gapu iti kasta a kinamatalek, inkari ni Jehova: “Manipud ken Jonadab nga anak ni Recab awanto ti magessat a maysa a lalaki nga agtakder iti sanguanak a kanayon.”​—Jer 35:1-19.