JEHOSAFAT, NABABA A TANAP NI

Nabatad a maysa a simboliko a disso, maawagan met iti “nababa a tanap ti pangngeddeng.” (Joe 3:2, 14) Yantangay nainaig dayta iti panangipakat ti Dios iti panangukom, mayanatup a maawagan iti “nababa a tanap ni Jehosafat,” ta ti nagan a Jehosafat kaipapananna “Ni Jehova ket Ukom.” Kasta met, bayat ti panagturay ni Jehosafat, inispal ni Jehova ti Juda ken Jerusalem manipud kadagiti nagtitipon a puersa ti Ammon, Moab, ken ti nakabambantay a rehion ti Seir, a riniribukna dagiti puersa ti kabkabusor ket pinagpipinnatayna ida.​—2Cr 20:1-29.

Iti simboliko a “nababa a tanap ni Jehosafat,” ukomen ni Jehova dagiti nasion kas maikari iti pannakapapatay maigapu iti dakes a panangtratoda iti ilina. Ti mismo a nababa a tanap ket nagpaay kas maysa a nakadakdakkel a simboliko a pagpespesan iti ubas a pakarumekan dagiti nasion a kasla rinaraay nga ubas. Ti sumagmamano literal nga inaigda ti “nababa a tanap ni Jehosafat” iti Ginget Kidron, iti Ginget ti Hinnom, wenno iti Ginget ti Jezrael, ngem saan la ketdi a nainkalintegan dayta. Awan kadagitoy a ginget ti umdas ti kalawana a makalaon iti “amin” a nasion.​—Joe 3:1-3, 12-14; idiligyo ti Apo 14:18-20.