JERAMEEL

[Ti Dios Mangipakita Koma iti Asi; Ti Dios Nangipakita iti Asi].

1. Ti inauna ni Hezron nga apoko ni Juda. Ti naarian ken Mesianiko a kapuonan limmasat iti kabsat ni Jerameel a ni Ram (mabalbalin nga isu met laeng ni Arni). Maysa nga atiddog a listaan ti kapuonan ti nairaman maipaay kadagiti kaputotan ni Jerameel, a ti dadduma kadakuada ket nagnaed iti makin-abagatan a paset ti Juda.​—1Cr 2:4, 5, 9-15, 25-42; 1Sm 27:10; Lu 3:33.

2. Anak wenno kaputotan ti Merarita a Levita nga agnagan Kis.​—1Cr 24:26, 29; 23:21.

3. Maysa kadagiti tallo a lallaki nga imbaon ni Ari Jehoiaquim idi maikalima a tawenna tapno kemmegenda da Jeremias ken Baruc. Nupay kasta, nagsublida nga ima-ima ta ni Jehova pinagtalinaedna a silelemmeng dagiti matalek nga adipenna.​—Jer 36:9, 26.

Yantangay ni Jehoiaquin a suno ken maipagarup nga inauna ni Jehoiaquim ket agarup 12 laeng ti tawenna idi maikalima a tawen a panagturay ni amana, mabalin nga ub-ubing pay ti dadduma nga annak ni Jehoiaquim, naubingda unay a maibaon iti mision a kas iti nakaibaonan ni Jerameel. (2Ar 23:36; 24:6, 8) Gapuna, ti pannakaawag ni Jerameel kas “anak ti ari” mabalin a kaipapananna nga isu maysa a kameng ti naarian a sangakabbalayan wenno maysa nga opisial a naarian ti nagtaudanna, saan ket a maysa a putot ti ari.

Makapainteres ti pannakatakuat iti maysa a lamma ti selio, naikuna a nagtaud iti maikapito a siglo K.K.P., a pakabasaan iti: “Kukua ni Jerameel nga anak ti ari.”​—Israel Exploration Journal, Jerusalem, 1978, Tomo 28, p. 53.