JESSE

[napaababa a porma ti Issia, a kaipapananna ti “Ipalipat ni Jehova”; wenno, mabalin a, napaababa a porma ti Abisai].

Ama ni Ari David iti tribu ni Juda; apoko da Ruth ken Boaz ken maysa a kasilpo iti linia ti kapuonan manipud ken Abraham agingga ken Jesus. (Ru 4:17, 22; Mt 1:5, 6; Lu 3:31, 32) Naaddaan ni Jesse iti walo nga annak, a nalabit natay ti maysa kadakuada sakbay a naaddaan iti bukodna nga annak, a mabalin a dayta ti makagapu a naikkat ti naganna iti listaan dagiti kapuonan iti Cronicas. (1Sm 16:10, 11; 17:12; 1Cr 2:12-15) Ti dua a kakabsat ni David a da Abigail ken Zeruia ket saan a naawagan iti annak a babbai ni Jesse, no di ket naawagan ti maysa kadakuada iti “anak a babai ni Nahas.” (1Cr 2:16, 17; 2Sm 17:25) Mabalin a daytoy a Nahas ket immuna nga asawa ti nagbalin nga asawa ni Jesse, isu a dagiti immuna nga annak a babbai ti asawa ni Jesse ken dagiti annak ni Jesse kenkuana ket agkakabsatda iti ina, malaksid no ti Nahas ket sabali pay a nagan ni Jesse, wenno nagan ketdi ti asawana, kas kuna ti dadduma.

Ni Jesse ket agtagtagikua kadagiti karnero nga agnanaed idiay Betlehem. Kalpasan a timmallikud ni Ari Saul iti pudno a panagdaydayaw, ni Jehova imbaonna ni Samuel a mapan iti pagtaengan ni Jesse tapno pulotanna ti maysa kadagiti annakna kas ari. Inyeg ni Jesse ti pito nga in-inauna a lallaki, ngem idi awan kadagitoy ti pinili ni Jehova napilitan ni Jesse a mangipaayab iti inaudian nga anakna a ni David manipud iti panagpapaarabna kadagiti karnero; daytoy nga anak ti pinili ni Jehova.​—1Sm 16:1-13.

Idi a ni David ket pinaayaban ni Saul tapno agtokar iti makapabang-ar nga arpa maipaay kenkuana, nangipatulod ti lakayen a ni Jesse iti adu a sagut agpaay ken Saul ken idi agangay, pinalubosanna ni David nga agtalinaed iti sumagmamano a tiempo tapno agserbi iti palasio ni Saul. (1Sm 16:17-23; 17:12) Kamaudiananna, nabatad nga idi nagsublin ni David nga agaywan kadagiti karnero, imbaon ni Jesse a mangipan iti sumagmamano a taraon nga agpaay iti tallo a kalakayan a lallaki, nga adda iti buyot ni Saul. (1Sm 17:13, 15, 17, 18, 20) Idi tiempo a pugante ni David gapu ken ni Saul, pinagkamangna idiay Moab da Jesse ken ti asawana.​—1Sm 22:3, 4.

Adda dagiti tattao a kas kada Saul, Doeg, Nabal, ken Sheba a masansan a nangawag ken David iti “Anak ni Jesse” kas panglais (1Sm 20:27, 30, 31; 22:7-9, 13; 25:10; 2Sm 20:1; 1Ar 12:16; 2Cr 10:16), ngem naaramat dayta nga awag iti dadduma a gundaway nga addaan dakdakkel a panagraem, kas pagarigan, inaramat ni David a mismo, ni Esdras, ken ni Jehova a Dios.​—1Sm 16:18; 17:58; 2Sm 23:1; 1Cr 10:14; 12:18; 29:26; Sal 72:20; Lu 3:32; Ara 13:22.

Natungpal ken Kristo Jesus ti naimpadtuan a kari a “ti ramut ni Jesse” ‘agtakder kas maysa a pagilasinan a maipaay iti il-ili’ ken mangukom buyogen ti kinalinteg, a gapu ta imortal ni Kristo Jesus mataginayonna a sibibiag ti linia ti kapuonan ni Jesse.​—Isa 11:1-5, 10; Ro 15:8, 12.