MASAKSAKUPAN A DISTRITO
Administratibo a benneg ti maysa a maiturturayan a daga nga adda iti sidong ti maysa a sentral a gobierno. (Est 1:16; 2:3, 18) Ti Biblia dakamatenna dagiti masaksakupan a distrito mainaig iti Israel, Babilonia, ken Medo-Persia. (1Ar 20:14-19; Est 1:1-3; Da 3:1, 3, 30) Ti Hebreo ken Aramaiko a sao maipaay iti “masaksakupan a distrito” (medhi·nahʹ) ket nagtaud iti berbo a din, a kaipapananna ti “mangukom.”
Ni Daniel a mammadto napagbalin nga agturay iti intero a masaksakupan a distrito ti Babilonia, nalabit ti kangrunaan a masaksakupan a distrito a nangsaklaw iti siudad ti Babilonia. (Da 2:48) Ti tallo a Hebreo a kakaduana, da Sidrac, Mesac, ken Abednego, nadutokanda met nga agserbi kadagiti administratibo a saad iti daytoy a distrito. (Da 2:49; 3:12) Agparang a ti Elam ket sabali pay a masaksakupan a distrito ti Babilonia. (Da 8:2) Mabalin a gapu ta nagnanaedda iti masaksakupan a distrito ti Babilonia, dagiti napagsubli a Judio a destiero naawaganda iti “annak ti masaksakupan a distrito.” (Esd 2:1; Ne 7:6) Wenno, daytoy nga awag mabalin nga iparipiripna nga agnanaedda iti Medo-Persiano a masaksakupan a distrito ti Juda.—Ne 1:3.
Uray pay bayat ti panagturay ni Asuero (Xerxes I), ti Imperio ti Medo-Persia buklen idin ti 127 a masaksakupan a distrito, manipud India agingga iti Etiopia. Naiwarawara dagiti Judio iti intero daytoy a nakalawlawa a pagturayan. (Est 1:1; 3:8; 4:3; 8:17; 9:2, 30) Ti daga ti Juda, agraman bukodna a gobernador ken nababbaba nga administratibo a pannakaulo, ket maysa idi kadagiti 127 a masaksakupan a distrito. (Ne 1:3; 11:3) Nupay kasta, agparang a ti Juda ket paset ti dakdakkel pay a napolitikaan a benneg a tinarawidwidan ti maysa a nangatngato nga opisial ti gobierno. Nalawag a dagiti aniaman a serioso a reklamo mainaig kadagiti distrito iti sidong ti masakupanna ket indatag daytoy nga opisial iti saklang ti ari ket kalpasanna inurayna ti naarian nga autorisasion sa agtignay. Kasta met, dagiti nababbaba nga opisial mabalinda a kiddawen ti pannakausisa ti ar-aramid ti maysa a masaksakupan a distrito. (Esd 4:8-23; 5:3-17) No autorisaran ti ari, dagiti masaksakupan a distrito mabalinda ti umawat iti kuarta manipud iti naarian a paggamengan, ket maipatulod dagiti naarian a bilin babaen kadagiti agitultulod a maipan iti nadumaduma a paset ti imperio. (Esd 6:6-12; Est 1:22; 3:12-15; 8:10-14) Gapuna, amin dagiti agnanaed kadagiti masaksakupan a distrito pagaammoda ti linlinteg ken bilbilin ti sentro a gobierno.—Idiligyo ti Est 4:11.
Ti sistema dagiti masaksakupan a distrito nga adda kadagiti nasion idi ugma masansan a pinagbalinna a narikrikut ti kasasaad dagiti iturayan nga il-ili. Daytoy a kinapudno ket bigbigen ti masirib a mannurat ti Eclesiastes (5:8).—Kitaenyo ti PROBINSIA.