KEILA

Maysa a nasarikedkedan a siudad ti Juda nga adda iti Sefela. (Jos 15:20, 33, 44; 1Sm 23:7) Ti Keila ket mabalin nga imbangon dagiti Calebita wenno, adda idi tiempo nga inturayanda dayta. (1Cr 4:15, 19) Kadawyan a maikunkuna nga isu ti Khirbet Qila (Qeila), nga adda iti maysa a turod nga agarup 14 km (8.5 mi) iti amianan a laud ti Hebron. Kas iti rehion ti kadaanan a Keila, pagmulmulaan pay laeng ita iti bukbukel ti aglawlaw ti Khirbet Qila.​—Idiligyo ti 1Sm 23:1.

Idi pugante pay laeng ni David gapu ken Ari Saul, inispalna ti Keila manipud panangparmek koma dagiti Filisteo. Ngem kalpasan dayta, napilitan a pimmanaw iti siudad a kaduana dagiti tattaona tapno saan ida nga iyawat dagiti agtagtagikua iti daga iti Keila iti im-ima ti buyot ni Saul.​—1Sm 23:5, 8-13.

Napagnaedan manen ti siudad kalpasan ti pannakaidestiero idiay Babilonia. Idi tiempo nga idadauluan ni Nehemias ti pannakatarimaan dagiti pader ti Jerusalem, ti dua a kagudua a distrito ti Keila ket adda bukod a “prinsipe” tunggal distrito.​—Ne 3:17, 18.