LEHION

Ti nagan nga inusar ti maysa kadagiti dua a nagunggan-ti-sairo a lallaki a nasabat ni Kristo Jesus iti rehion iti daya ti Baybay ti Galilea. Nupay kasta, nalawag a saan a Lehion ti mismo a naganna, agsipud ta tumukoy dayta iti kasasaadna a nagunggan ti adu a sairo. Mabalin a daydiay pannakaulo dagitoy a sairo ti nangtignay iti daytoy a lalaki tapno kunaenna: “Ti naganko ket Lehion.” Gapu ta dagiti lehion ti Roma idi umuna a siglo K.P. ket kadawyan a buklen ti 6,000 a lallaki, masinunuotayo no kasano kaadu ti bilang dagiti sairo a nairaman. Narungsot unay ti lalaki a nagunggan ti sairo ken ti kaduana ta awan ti nakaitured a lumabas iti disso a pagnanaedanda iti nagtetengngaan dagiti tanem. Iti sidong ti impluensia ti sairo, nagpagnapagna a silalamolamo ti lalaki a nangikuna a ti naganna ket Lehion, ket aldaw ken rabii a nagik-ikkis iti napigsa ken iniw-iwana ti bagina babaen kadagiti bato. Saan a nagballigi ti amin a panagregget a mangparaut kenkuana, uray babaen kadagiti grilios ken kawar. Nupay kasta, winayawayaan ni Kristo Jesus daytoy a lalaki ken ti kaduana manipud pannakabalin dagiti sairo. Kalpasan dayta, dagiti naparuar a sairo simrekda iti maysa a pangen dagiti baboy ket pinagdarurosda dagitoy iti maysa a teppang a nagturong iti pannakatayda iti Baybay ti Galilea.​—Mt 8:28-34; Mr 5:1-20; Lu 8:26-39; kitaenyo ti BABOY; GADARENO, DAGITI.

Maipaay kadagiti detalye maipapan kadagiti lehion ti Roma, kitaenyo ti BUYOT (Romano).