MAHISTRADO

Iti sidong ti gobierno ti Babilonia, dagiti mahistrado ti polisia ket sibil nga opisial kadagiti masaksakupan a distrito a nalaing iti linteg ken addaan limitado nga autoridad a mangukom. Karamanda kadagiti opisial a naguummong tapno agruknoy iti ladawan a balitok ni Nabucodonosor.​—Da 3:2, 3.

Kadagiti kolonia ti Roma, ti panangituray iti gobierno ket adda iti im-ima dagiti mahistrado sibil, naawagan iti stra·te·goiʹ kadagiti Griego a siudad. Mabalin a buklen ti 3, 4, kadawyan a 5, wenno mabalin a 10 wenno 12 a miembro ti grupo dagiti mahistrado. Pagrebbengan dagitoy ti mangtaginayon iti talna, mangaywan iti pondo, mangusig ken mangukom kadagiti nagsalungasing iti linteg, ken mangibilin a maipakat ti dusa. No dadduma agparang dagiti nagan ken tituloda kadagiti sinsilio nga imparuar ti maysa a siudad. Adda dagiti naituding kadakuada a kostable, wenno lictor, a mangipatungpal kadagiti bilinda.​—Kitaenyo ti KOSTABLE.

Imbilin dagiti mahistrado sibil idiay Filipos a kolonia ti Roma (Ara 16:12) a maikabil da Pablo ken Silas kadagiti tul-ong nupay saanda a nausig. Iti simmaganad nga aldaw, nangibaon dagiti mahistrado kadagiti kostable a mangluk-at kadakuada. Ngem tapno ti naimbag a damag nga inkaskasabana ket maalangonna iti publiko ken iti legal a pamay-an, kiniddaw ni Pablo a dagiti mahistrado a mismo ti mangluk-at kadakuada. Gapu ta mabuteng dagiti mahistrado nga ungtan ida ti Roma gapu iti panangsaplit kadagiti umili ti Roma, nagpakaasida kada Pablo ken Silas sada linuk-atan ida.​—Ara 16:19-39.