MARTA
Maysa a babai a Judio, ti kabsat da Lazaro ken Maria a taga Betania. (Jn 11:1, 2) Nabatad a masansan a sumarungkar ni Kristo iti pagtaenganda no adda idi iti asideg ti Jerusalem. Adda idi ti singgalut ti panagpipinnateg iti nagbaetan ni Kristo ken dagitoy a tallo, ta espesipiko a naikuna: “Ita ni Jesus inayatna ni Marta ken ti kabsatna a babai ken ni Lazaro.”—Jn 11:5.
Impadamag ni Lucas nga idi simrek ni Jesus iti “maysa a purok,” “maysa a babai a managan Marta ti immawat kenkuana kas sangaili iti balay.” (Lu 10:38) Sigun iti Mateo 26:6, Marcos 14:3, ken Juan 12:1-3, naipagarup a ni Marta ket asawa, wenno biuda, wenno anak ketdi ni Simon nga agkukutel. Nupay kasta, awan ti espesipiko nga ibaga ti Kasuratan a mangsuporta kadagitoy a panangmatmat.
Iti maysa a gundaway, idi simmarungkar ni Jesus iti pagtaengan da Lazaro, Maria, ken Marta, “nagtugaw [ni Maria] iti sakaanan ti Apo ket nagim-imdeng iti saona,” idinto ta ni Marta “nasinga iti panagasikaso iti adu nga annongen.” Pinadas ni Marta a kiddawen ti panangtulong kenkuana ni Maria, a kunkunana: “Apo, saanmo kadi a pakaseknan a ti kabsatko binaybay-annak nga agmaymaysa a mangasikaso iti bambanag? Ngarud, ibagam kenkuana a tumulong kaniak.” Nabatad a maseknan ni Marta a mangipaay iti isuamin a material a kasapulan ni Jesus. Ngem impaganetget ni Kristo nga adayo a napatpateg ti naespirituan a bambanag sana siaayat a tinubngar, a kunkunana: “Marta, Marta, maringgoran ken mariribukanka maipapan iti adu a banag. Nupay kasta, sumagmamano a banag ti kasapulan, wenno maysa laeng. Iti biangna, pinili ni Maria ti naimbag a bingay, ket saanto a maikkat kenkuana dayta.” (Lu 10:38-42) Mapneken ni Kristo iti maysa laeng a taraon no gapu iti dayta ket magun-odan met ni Marta ti dakdakkel a gunggona manipud panangisurona.
Nupay kasla maseknan unay ni Marta iti namaterialan a bambanag, saan koma nga ipapan nga awan interesna iti naespirituan a bambanag. Kalpasan ti ipapatay ni Lazaro, ni Marta ti simmabat idi nagdaliasat ni Jesus nga agturong iti Betania, idinto ta ni Maria, idi damo, ket situtugaw iti pagtaenganda (mabalin a gapu iti ladingit wenno gapu ta adu ti sumarsarungkar a gagayyemda). Imparangarang ni Marta ti pammati ken Kristo idi imbagana a saan koma a natay ni Lazaro no adda idi ni Jesus. Binigbigna pay: “Ammok a bumangonto inton panagungar iti kamaudianan nga aldaw,” pammaneknek daytoy a mamati iti panagungar. Bayat nga agsarsaritada, inlawlawag ni Jesus nga isu “ti panagungar ken ti biag,” nga impatuldona nga uray matay ti maysa nga addaan pammati kenkuana, agbiagto manen. Idi dinamag ni Kristo ken Marta, “Patiem kadi daytoy?” nabatad nga imparangarang ni Marta ti pammatina idi insungbatna: “Wen, Apo; namatiak a sika ti Kristo nga Anak ti Dios, Daydiay umay iti lubong.” (Jn 11:19-27) Siempre, adda latta posibilidadna a mabalin a nagduadua met no ania ti maaramidan idi wenno aramiden ni Jesus iti natayen a kabsatna. (Idiligyo ti kababalin dagiti apostol a naisalaysay iti Lu 24:5-11.) Idi addadan iti tanem ni Lazaro ket imbilin ni Kristo a maikkat ti bato, kinuna ni Marta: “Apo, itan nabuyoken, ta uppat nga aldawen.” Ngem kas sungbat dinamag ni Jesus: “Saanko aya nga imbaga kenka a no mamatika makitam ti dayag ti Dios?” Nasaksianna dayta, babaen ti pannakapagungar ti kabsatna.—Jn 11:39-44.
Kalpasan ti panagungar ni Lazaro, pimmanawen ni Kristo. Idi agangay, nagsubli idiay Betania ket iti pagtaengan ni Simon nga agkukutel nakitaripnong kadagiti dadduma pay, a pakairamanan da Marta, Maria, ken Lazaro. Nangisaganada iti pangrabii ket ‘nagserserbi manen ni Marta.’ Adda ni Lazaro iti panganan, ket iti daydi a gundaway ti panangsapsapo ni Maria ken Jesus iti nangina a bangbanglo a lana. (Jn 12:1-8; Mt 26:6-13; Mr 14:3-9) Kalpasan dayta, awanen ti ibaga ti Kasuratan maipapan kadagiti simmaganad a pasamak iti biag ni Marta ken maipapan iti tiempo ti ipapatayna ken dagiti pasamak a nainaig iti dayta.