PAGRUKOD A PARTENG

Linas, tali, wenno singdan a nausar a pagrukod. (1Ar 7:15, 23; Am 7:17; Zac 2:1, 2) Ti sumagmamano a pagrukod a parteng ket nalawag a nabingbingay kadagiti kasiko. (2Cr 4:2) Ti rukod ti maysa a kadisso ti daga nasinunuo babaen ti panangyunnat wenno panangipalladaw iti rabawna iti maysa a pagrukod a parteng. (Idiligyo ti Job 38:4, 5; Sal 78:55; Mik 2:4, 5.) Inaramat dayta dagiti managibangon, kas pagarigan, no ibalabalada ti maysa a siudad. (Jer 31:38, 39; Zac 1:16) Ti agkitkitikit iti kayo mabalin nga usarenna met dayta tapno pangtandana kadagiti rukod ti maysa a banag. (Isa 44:13) Iti maysa a pasamak, agparang a dagiti mapapatay a naparukma a Moabita ket rinukod ni Ari David tapno mailasin manipud kadagidiay mataginayon a sibibiag.​—2Sm 8:2.

Piguratibo nga Usar. Iti piguratibo nga anag, ti “pagrukod a parteng” ipasimudaagna ti pagannurotan, wenno pagalagadan, a mangtarawidwid iti maysa a tignay. (Isa 28:10, 13) Kas pagarigan, pinagbalin ni Jehova ti ‘kinahustisia kas pagrukod a parteng’ no makilanglangen idi iti di matalek nga ilina. (Isa 28:17) Ti panangipakatna iti isu met laeng a pagrukod a parteng iti Jerusalem kas iti inaramidna iti Samaria impatuldona ti umasping a pannakalangalang maipaay iti Jerusalem. (2Ar 21:13; Un 2:8) Ti panangyunnatna iti “pagrukod a parteng ti kinaongaong” iti Edom impasimudaagna met ti pannakadadael, ket ti pannakausar daytoy a pagrukod a parteng kaipapananna ti panangbingbingay iti daga agpaay kadagiti animal a mangrugi nga agnaed iti nalangalang a luglugar ti Edom.​—Isa 34:5-17.

Imbilang ni David ti pannakirelasionna ken Jehova kas bingayna iti biag. Makapnek unay daytoy a tawid, a nakatignayanna a mangikuna: “Dagiti met laeng pagrukod a banteng [parteng] naitumpong kaniak kadagiti makaay-ayo a disso.”​—Sal 16:5, 6; idiligyo ti Nu 18:20.

Dagiti nailangitan a banag paneknekanda ti panagparsua nga aramid ti Dios, ket yantangay ti naulimek a pammaneknekda punnuenna ti daga, maikuna ti salmista maipapan kadakuada: “Iti intero a daga nagsaknap ti pagrukodda a parteng.”​—Sal 19:1-4; Ro 1:20.

Kitaenyo ti RUNO.