KANGATUAN
Makinngato-amin no iti lugar, wenno saad. Ti Hebreo a sao nga ʽel·yohnʹ, naaramat mainaig ken Jehova kas “Kangatuan,” nayaplikar met iti dadduma pay a persona wenno bambanag: Ti Mesianiko nga Ari, ti Dakdakkel a David, kas nangatngato ngem iti dadduma pay a naindagaan nga ar-ari (Sal 89:20, 27), ti naikari iti Israel a saad iti ngatuen ti nasnasion (De 26:18, 19), ti makinngato-amin a labba (Ge 40:17), ti makinngato a ruangan (2Ar 15:35), ti makinngato a ban-aw (2Ar 18:17), ti makinngato a paraangan (Jer 36:10), ti makinngato-amin a kadsaaran (Eze 41:7), dagiti makinngato-amin a siled a panganan (Eze 42:5), Makinngato a Bet-horon (Jos 16:5), ken ti makinngato nga ubbog ti dandanum ti Gihon (2Cr 32:30). Ipakita dagitoy a pannakaaramat a ti ʽel·yohnʹ ipasimudaagna ti nagsaadan imbes a pannakabalin.
No mayaplikar ken Jehova, ti “Kangatuan” ipaganetgetna ti katan-okan a saadna iti ngatuen ti amin a sabsabali pay. (Sal 83:18) Damo nga agparang daytoy a titulo iti Genesis 14:18-20 a kadua ti ʼEl (Dios), a sadiay ni Melquisedec ket naawagan iti “padi idi ti Kangatuan a Dios” ken, iti dayta nga akem, binendisionanna ni Abraham kasta met a binenditona ti Kangatuan a Dios. Ti “Kangatuan” maar-aramat a kombinasion ti nadibinuan a nagan a Jehova (Ge 14:22; Sal 7:17) ken kombinasion ti ʼElo·himʹ (Dios) a pangadu a porma ti kinatan-ok (Sal 78:56), ken agparang met a bukbukod.—De 32:8; Sal 9:2; Isa 14:14.
Ti Aramaiko a pangadu a porma nga ʽel·yoh·ninʹ agparang iti Daniel 7:18, 22, 25, 27, a sadiay mabalin nga ipatarus kas “Daydiay Katan-okan” (NW), a ti pangadu a porma ket mangipasimudaag iti kinatan-ok, natan-ok. Ti Aramaiko a porma iti pangmaymaysa a bilang, ʽil·laiʹ (Kangatuan), ket naaramat iti Daniel 7:25.
Ti Griego a sao a hyʹpsi·stos (Kangatuan), kas agaplikar ken Jehova, ket kangrunaanna nga inaramat ni Lucas, iti Ebangheliona (namindua iti pakaammo ni Gabriel ken Maria maipapan iti pannakayanak ni Jesus) ken iti Aramid. (Lu 1:32, 35, 76; 6:35; 8:28; Ara 7:48; 16:17) Ti dadduma pay a nagparanganna ket iti Marcos 5:7 ken Hebreo 7:1.