SANGA

[Heb., ʽash; sas (sanga iti pagan-anay); Gr., ses].

Maysa nga insekto nga uppat ti payakna nga umarngi iti kulibangbang ngem dutdotan ken awan napatak a timbukel iti murdong dagiti rungona. Saan a kas kadagiti kulibangbang, dagiti payak ti sanga no saan nga agtaytayab ket mabalin a nakadisso iti bukotna wenno nakaukrad iti agsumbangir a sikiganna. Kasta met, kadawyanna nga aktibo dagiti sanga bayat ti rabii. Ti insekto a natukoy iti Kasuratan ket nabatad nga isu ti webbing clothes moth (Tineola bisselliella), nangnangruna no igges pay laeng. (Job 13:28; Sal 39:11; Isa 50:9; 51:8; Os 5:12; Mt 6:19, 20; Lu 12:33; idiligyo ti San 5:2.) Idi inladawan ni Elifaz ti kasasaad ti mortal a tao, dinakamatna ti nalaka a pannakarumek ti maysa a sanga.​—Job 4:17, 19, 20.

Dagiti kabaian a clothes moth ket agitlog kadagiti tela a delana wenno seda wenno kadagiti lupot a naaramid iti dutdot ti animal, nga iwarasda dagita nga itlog tapno adda nalawa a pagyanan ken pagtaraon dagiti tumaud nga igges. Saan a mangan dagitoy nga igges agingga a saanda a maprotektaran ti bagida iti ‘balay’ wenno bungon a naaramid kadagiti linabag nga adda iti aglawlawda. Agtalinaedda iti daytoy a ‘balay’ bayat a mangmanganda.​—Job 27:18.