NOEMI
[Ti Kasasaadko kas Makaay-ayo].
Katugangan ni Ruth, a maysa nga inapo da David ken Jesu-Kristo.—Mt 1:5.
Ni Noemi ti asawa ni Elimelec, maysa nga Efrateo iti Betlehem idiay Juda, idi kaaldawan ti Uk-ukom. Kabayatan ti nakaro a bisin, isu ken ti asawana ken ti dua nga annakda a lallaki, da Malon ken Kilion, immakarda idiay Moab. Sadiay a natay ni Elimelec. Idi agangay, nangasawa dagiti annakda iti Moabita a babbai, da Ruth ken Orpa, ngem agarup sangapulo a tawen kalpasanna, natay dagitoy nga annak nga awanan putot.—Ru 1:1-5.
Ti natayan a ni Noemi inkeddengna ti agsubli idiay Juda. Nangrugi a kumuyog kenkuana dagiti dua a nabalo a manugangna, ngem imbalakad ni Noemi nga agsublida ket makiasawada idiay bukodda a daga, ta ni Noemi ‘baket unayen nga agbalin a kukua ti maysa nga asawa’ ken saanen a makaipaay iti annak nga agbalin nga assawada. Nagsubli ni Orpa, ngem ni Ruth nagtalinaed ken Noemi, gapu iti ayatna ken Noemi ken iti Diosna a ni Jehova.—Ru 1:6-17.
Idi dimtengda idiay Betlehem, kinuna ni Noemi kadagiti babbai a kimmablaaw kenkuana: “Saandak nga awagan iti Noemi [Ti Kasasaadko kas Makaay-ayo]. Awagandak iti Mara [Napait], ta ti Mannakabalin-amin pinagbalinna a napait unay kaniak.” (Ru 1:18-21) Gapu ta tiempo idi ti panagani iti sebada, sirarag-o a napan nagtrabaho ni Ruth, a nagad-adas tapno masuportaranna ni Noemi ken ti bagina, ket di inranranta a nakadap-aw iti talon ni Boaz. (Ru 2:1-18) Idi imbagana ken Noemi no makintalon ti nagadasanna, nabigbig ni Noemi a ni Jehova ti nangiturong iti dayta a banag, yantangay ni Boaz ket asideg a kabagian ni Elimelec, ngarud maysa ni Boaz kadagiti manangsaka maipaay kadakuada. Pinaregtana ni Ruth nga idatagna ken Boaz daytoy a kinapudno. (Ru 2:19–3:18) Sidadaras a nagtignay ni Boaz, a sinurotna ti nakayugalian a legal a pamay-an iti panangsaka iti sanikua ni Elimelec manipud ken Noemi. Iti kasta, nagbalin ni Ruth nga asawa ni Boaz maigapu ken Noemi, mayannugot iti linteg ti pannakiasawa iti asideg a kabagian. Idi naipasngay kadakuada ti maysa nga anak a lalaki, dagiti kaarruba a babbai pinanagananda dayta iti Obed, a kinunada: “Nayanak ken Noemi ti maysa nga anak a lalaki.” Gapuna nagbalin ni Obed a legal nga agtawid iti balay ni Elimelec a maysa a kaputotan ni Juda.—Ru 4:1-22.