NETINEO

[Dagidiay Naipaay].

Dagitoy ket agserserbi wenno ministro iti templo, ngem saanda nga Israelita. (1Cr 9:2; Esd 8:17) Dagiti pannakabagi ti 35 a pamilia dagiti Netineo ket karaman kadagidiay nagsubli a kadua ni Zorobabel idi 537 K.K.P. manipud pannakaidestiero idiay Babilonia. (Esd 2:1, 2, 43-54, 58; Ne 7:46-56, 60; ti annak da Accub, Hagab, ken Asna, nga inlista ni Esdras ket saan a dinakamat ni Nehemias. Mabalin a naitiponda iti dadduma a nagan ti pampamilia.) Kasta met, idi 468 K.K.P., adda dagiti Netineo a kimmuyog ken Esdras manipud Babilonia agingga idiay Jerusalem. (Esd 7:1-7) Kalpasan dayta, nakipaset ti sumagmamano a Netineo iti panangtarimaan iti pader ti Jerusalem. (Ne 3:26) Kadua met ida dagiti Israelita a nangaramid iti maysa a tulag a saanda nga iyasawa ti annakda kadagiti ganggannaet.​—Ne 10:28-30.

Nalabit adu kadagiti Netineo ti kaputotan dagiti Gabaonita a pinagbalin ni Josue kas “agur-urnong iti kayo ken agsaksakdo iti danum maipaay iti gimong ken maipaay iti altar ni Jehova.” (Jos 9:23, 27) Nalawag a ti dadduma a Netineo ket manipud kadagiti kinautibo ni Ari David ken dagiti prinsipena. (Esd 8:20; idiligyo ti Sal 68:18.) Dagiti Netineo a kameng ti pamilia ni Meunim ket mabalin a kaputotan dagiti kinautibo ni Ari Ozias ti Juda. (2Cr 26:7; Esd 2:50; Ne 7:52) Mabalin a kaputotan ni Ismael babaen ken Nafis ti sabali pay a grupo dagiti Netineo, nga isu dagiti “annak ni Nefusim” (Nefusesim).​—Ge 25:13-15; Esd 2:50; Ne 7:52.

Idi nakasublin dagiti Netineo manipud pannakaidestiero, nagnaedda idiay Ofel, nalawag nga iti asideg ti nakaibangonan ti templo, ken iti dadduma pay a siudad. (Esd 2:70; Ne 3:26, 31; 7:73; 11:3, 21) Gapu ta agserserbida iti templo, saan ida a pinagbayad ti Persiano nga Ari Artaxerxes iti buis, impuesto, ken kuartais.​—Esd 7:24.