NOBA

1. [manipud puon a berbo a kaipapananna ti “agtaul”]. Maysa nga Israelita, nalabit iti tribu ni Manases, a nangkautibo iti Kenat ken kadagiti agpampannuray nga ilina. Kalpasan dayta pinanagananna ti siudad iti bukodna a nagan.​—Nu 32:42.

2. Maysa a siudad iti daya ti Jordan, kinautibo ni Noba. (Nu 32:39, 42) Nabatad a saan a nagtalinaed ti nagan a Noba, agsipud ta idi agangay naawagan dayta iti sigud a naganna, Kenat. (1Cr 2:23) Adu ti mangibagbaga a dagiti rebba idiay Kanaouat, agarup 90 km (60 mi) iti abagatan nga abagatan-a-daya ti Damasco, isu ti nagsaadan ti kadaanan a disso.

3. Lugar a masarakan iti daya ti Jordan ken iti asideg ti Jogbea idiay Gad. (Nu 32:34, 35; Uk 8:11) Saan nga ammo ita ti apag-isu nga ayanna.