OTNIEL

Ti kaunaan a nainaganan nga ukom ti Israel kalpasan ni Josue. Ni Otniel ket “anak ni Quenaz, ub-ubing a kabsat ni Caleb.” (Uk 1:13; 3:9; Jos 15:17) Nupay daytoy a pannakadakamatna ket mabalin a kayatna a sawen a ni Otniel wenno ni Quenaz ti ub-ubing a kabsat ni Caleb, masapul nga ibilang ni Otniel kas kaanakan ni Caleb ken kas anak ni Quenaz a kabsat ni Caleb tapno tumunos dayta iti dadduma pay a teksto. Gapuna, ti mabasa iti sumagmamano a patarus ket: “Ni Otniel, ti anak ti ub-ubing a kabsat ni Caleb, a ni Quenaz.” (AT, Mo) Kanayonanna pay, ni Caleb ket “anak ni Jefune,” saan ngarud nga anak ni Quenaz a makin-anak ken Otniel.​—Nu 32:12; 1Cr 4:15.

Naasawa ni Otniel ti anak ni Caleb a ni Acsa gapu ta nagballigi maibusor iti Debir a salindeg dagiti Canaanita. Inkari ngamin ni Caleb nga itedna ti anakna a ni Acsa iti asinoman a makaparmek iti dayta a siudad. (Jos 15:16-19; Uk 1:11-15) Addaan ni Otniel iti anak nga agnagan Hatat ken nakaipasdek iti maysa a permanente a pamilia iti tribu ni Juda. Adu a tawen kalpasanna, adda napili manipud iti daytoy a pamilia tapno idauluanna bayat ti panagturay ni David ti bunggoy ti panagserbi nga addaan iti 24,000 a kameng.​—1Cr 4:13; 27:1, 15.

Walo a tawen ti kapaut ti damo a pannakairurumen ti Israel iti im-ima dagiti ganggannaet nga ar-ari gapu iti panagsukirda. Idi ‘nangrugida nga umasug ken Jehova maipaay iti tulong,’ imbangonna ni Otniel a mangispal kadakuada. Babaen ti espiritu ni Jehova nga adda ken Otniel, naparmekna ni Cusan-risataim, “ari ti Siria,” ket isu ti kangrunaan a namangulo kadagiti kakabsatna ken nangipaay kadagiti hudisial a pangngeddeng.​—Uk 3:8-11.