PADAN

[mabalin a, Tanap (Patad a Daga)].

Ti napaababa a porma ti “Padan-aram” (Ge 35:9; 48:7); nalawag nga isu met laeng ti “tay-ak ti Siria [Aram].” (Ge 28:6, 7; Os 12:12) Ti Padan ket maysa a rehion iti likmut ti siudad ti Haran idiay makin-amianan a Mesopotamia. (Ge 28:7, 10; 29:4) Nupay adda dagiti mangibilang a maymaysa ti Padan ken Aram-naharaim, ad-adda a posible a ti Padan ket paset idi ti Aram-naharaim. (Ge 24:10, Rbi8 ftn; 25:20, Rbi8 ftn) Maikuna a kasta agsipud ta ti Aram-naharaim adda saklawna a kabambantayan a lugar, idinto ta saan a kasta ti Padan no umiso ti panangipapan a ti naganna ket kaipapananna ti “tanap,” “patad a daga.”​—Nu 23:7, Rbi8 ftn; De 23:4, Rbi8 ftn.

Ti patriarka a ni Abraham temporario a nagtaeng iti Haran idiay Padan. (Ge 12:4; 28:7, 10) Idi agangay, nangala ti anakna a ni Isaac ken kalpasanna uray ti apokona a ni Jacob iti asawa manipud kadagiti annak dagiti kabagianna sadiay. (Ge 22:20-23; 25:20; 28:6) Duapulo a tawen a nagyan ni Jacob idiay Padan a nagserserbi iti katuganganna a ni Laban. (Ge 31:17, 18, 36, 41) Bayat nga adda sadiay, nayanak kenkuana ni Dina ken ti 11 nga annak. (Ge 29:20–30:24) Ti maika-12 nga anakna, ni Benjamin, ket nayanak idiay Canaan.​—Ge 35:16-18, 22-26; 46:15; 48:7.