POTIFAR
[manipud Egipcio, napaababa a porma ti Potifera].
Egipcio nga opisial ti palasio ken panguluen dagiti para-guardia ni Faraon. Isu ti apo ni Jose iti sumagmamano a tiempo ken mabalbalin a maysa a nabaknang a tao. (Ge 37:36; 39:4) Ni Potifar ginatangna ni Jose kadagiti agdaldaliasat a Midianita a komersiante ket, idi napaliiwna ti kinasayaat ni Jose kas adipen, idi agangay insaadna nga agaywan iti intero a balayna ken tay-akna. Dayta nga urnos ket binendisionan ni Jehova maigapu ken Jose.—Ge 37:36; 39:1-6.
Saan a matalek ken Potifar ti asawana kas iti kinamatalek ti adipenna a ni Jose. Maulit-ulit nga inkagumaanna a sulisogen ni Jose ket, maysa nga aldaw idi awan sabali a lallaki iti aglawlaw, ginammatanna, ngem nagkitakit ni Jose ket nagtaray a rimmuar. Idi nagawid ni Potifar, dinengngegna laeng ti adu nga ulbod a pammabasol ti napaay nga asawana. Gapu iti pungtot ni Potifar, impaibaludna ni Jose.—Ge 39:7-20.
Daytoy a pagbaludan kasla adda pannakainaigna iti balay ni Potifar wenno mabalbalin nga adda iti sidong ti autoridadna kas “panguluen dagiti para-guardia.” Gapuna, ibaga ti rekord a ti panguluen dagiti agaw-awit iti kopa ni Faraon ken ti panguluen dagiti panaderona naipisokda iti daytoy met laeng a pagbaludan, ti “pagbaludan iti balay ti panguluen dagiti para-guardia,” ti ‘pagbaludan iti balay ti apo [ni Jose].’ (Ge 39:1; 40:1-7) Nupay kasta, agparang nga imposible a ni Potifar isu met laeng ti “panguluen nga opisial ti balay a pagbaludan” a ‘nangyawat iti ima ni Jose kadagiti amin a balud nga adda iti balay a pagbaludan.’ (Ge 39:21-23) Daytoy nga opisial ket nalabit sakup ni Potifar.
Ti titulo ni Potifar nga “opisial ti palasio” ti pakaipatarusan ti Hebreo a sao a sa·risʹ, “eunuko,” nga iti nalawlawa a pannakausarna kaipapananna ti mayordomo, agserserbi iti palasio, wenno mapagtalkan nga opisial iti trono. Ti “opisial ti palasio [sa·risʹ] nga addaan kinaturay kadagiti lallaki ti gubat” idi narba ti Jerusalem idi 607 K.K.P. ket di pagduaduaan a maysa a nangato nga opisial ti gobierno, saan a kapon a tao a kurang ti kinamalalakina. (2Ar 25:19) Gapuna, maysa met ni Potifar a kameng ti militar, panguluen dagiti para-guardia, kasta met a naasawaan a tao—mangipasimudaag nga isu saan a eunuko sigun iti ad-adda a kadawyan a kaipapanan dayta a sao.