KINAREBELIOSO

Isusukir wenno iyaalsa ken panangkarit iti nangatngato nga autoridad. Ti panagpannakkel, kinamanagimbubukodan, dagiti panangsugsog manipud iti ruar, di iyaanamong iti pangngeddeng ti maysa a nangatngato, ken ti tarigagay a lumapsut iti pudpudno wenno arapaap a panangituray wenno pannakairurumen, ket karaman kadagiti kangrunaan a makagapu ti panagrebelde.

Nasapa a Pakasaritaan. Ti panagrebelde iti Dios nangrugi idiay di makita a disso. Babaen ti maysa a serpiente, inkagumaan ti maysa nga espiritu a parsua nga idi agangay naam-ammo kas Satanas a Diablo, nga allukoyen ti umuna a babai a ni Eva nga agrebelde maibusor iti Namarsuana. Pinagbalinna a makaay-ayo ti panagrebelde, a pinagparangna a mangibunga dayta iti ad-adu a pannakaammo. Timmulok ni Eva iti managimbubukodan nga ambision nga ‘agbalin a kas iti Dios,’ iti anag nga ikeddengna maipaay iti bagina no ania ti naimbag ken no ania ti dakes imbes nga agtulnog iti inkeddeng ti Dios iti daytoy a banag. (Kitaenyo ti KAYKAYO [Piguratibo nga Usar].) Yantangay impatona a mapapaidaman iti maysa a banag a pagarupennan a nainkalintegan nga agpaay koma kenkuana, pinili ni Eva a salungasingen ti bilin ti Dios. Idi agangay timmulok ti asawana a ni Adan iti panangpilitna ket kimmadua iti daytoy a panagrebelde. Inaramid ni Adan ti kasta, saan a gapu ta isu naallilaw a ti serpiente ket agsasao iti kinapudno, no di ket nabatad a gapu ta siaagum a pinilina ti makikadua iti managbasol nga asawana imbes a ti anamong ti Dios.​—Ge 3:1-6; 1Ti 2:14.

Iti sinigsiglo kalpasan dayta, agparang a kaaduan iti sangatauan saanda a kayat ti agpasakup iti Dios. Nanipud tiempo ti ipapatay ni Abel agingga iti pannakayanak ni Noe, periodo a nasurok a 926 a tawen, ni laeng Enoc ti espesipiko a nadakamat kas nakipagna iti Dios. (Ge 5:22) Ti kinarebelioso nagtultuloy met a nagsaknap idiay nailangitan a disso. Idi kaaldawan ni Noe, sisusukir a pinanawan dagiti anghel, a nagtarigagay iti linalasag a ragragsak, dagiti nailangitan a saadda, naglasagda kas tao, nangasawada iti babbai, ket nagputotda.​—Ge 6:4; 1Pe 3:19, 20; 2Pe 2:4, 5; Jud 6.

Idi tiempo ni Noe, ti sangatauan napno unayen iti espiritu ti kinarebelioso ta nakita ni Jehova a Dios a maikari a dadaelenna ti puli ti tao babaen iti layus. Ni laeng Noe ken ti mismo a pamiliana, waloda amin a persona, ti nasarakan a maikari a maitalimeng.​—Ge 6:5-8; 7:13, 23.

Iti Israel. Tawtawen kalpasanna, rinugian ni Jehova a Dios nga insalsalumina ti nasion ti Israel. Nupay kasta, iti intero a pakasaritaan ti Israel nakaad-adu dagiti kaso ti panagrebelde kas maysa a nasion, grupo, wenno indibidual maibusor ken Jehova ken kadagiti pannakabagina. Adda dagiti kaso a dagidiay nagrebelde ket saanda a rebelioso a tattao. Kas pagarigan, da Moises ken Aaron simamatalek a nagserbida ken Jehova a Dios iti adu a tawen. Nupay kasta, idi naipasangoda iti pannakapilit gapu kadagiti agrirriri nga Israelita, saanda a nakapagteppel ket nagrebeldeda a saan a nangidayaw iti Dios mainaig iti namilagruan pannakaipaayna a danum. (Nu 20:12, 24; 27:13, 14) Ngem ti nasion iti pakabuklanna nagtultuloy iti rebelioso a danana ta inyaplikar ti Ezequiel 44:6 ti nagan a “Kinarebelioso” iti balay ti Israel, a kasla ket tay ti nasion ti Israel iladawanna ti kinarebelioso.

Saan a binay-an ni Jehova a Dios a di madusa ti kasta a kinarebelioso. (1Sm 12:15; 15:23; 1Ar 13:21, 22, 26; Sal 5:10; Isa 1:20; 63:10; Jer 4:16-18; Eze 20:21; Os 13:16) Ti lintegna nagkalikagum iti dusa nga ipapatay maipaay kadagidiay agtultuloy nga agrebelde kadagiti nagannak. (De 21:18-21) Ti Dios dinusana iti ipapatay dagiti napannakkel ken ambisioso a da Kore, Datan, Abiram, ken dagidiay kakaduada a nagrebelde maibusor kada Moises ken Aaron, dagiti nadutokan a pannakabagi ti Dios. Idi sinupiat dagiti Israelita ti kinaumiso daytoy a dusa nga ipapatay ken nangiparangarangda iti rebelioso nga espiritu maibusor kada Moises ken Aaron, 14,700 pay ti napukaw babaen iti saplit manipud ken Jehova. (Nu 16:1-3, 25-50) Masansan nga ipalubos ni Jehova ti sabsabali a nasion nga agserbi kas instrumento a mangipakat iti pannusa kadagiti Israelita no timmulokda iti panangpilit nga agbalin a kas kadagiti nasion iti aglikmut ken nagrebeldeda a timmallikud iti pudno a panagdaydayaw.​—Uk 2:3, 11-16; 3:4, 5; Ne 9:26, 27.

Ti nangrakrak iti tulag a panagrebelde ni Ari Zedekias. Idi pinagbalin ni Ari Nabucodonosor ti Judeano nga Ari Zedekias kas basalio nga ari, pinagaramidna ni Zedekias iti tulag babaen iti nagan ni Jehova. Gapuna, idi nagrebelde ni Zedekias maibusor ken Nabucodonosor, a tinarigagayanna ti mawayawayaan manipud panagpasakup iti ganggannaet a pannakabalin, nagrebelde met maibusor ken Jehova, nga iti nagan ni Jehova nagsapata a rebbengenna ti agbalin a nasungdo a basalio nga ari. Gapu itoy a panagrebelde, inkeddeng ni Jehova a matay ni Zedekias kas kautibo idiay Babilonia.​—2Ar 24:17-20; 2Cr 36:11-21; Eze 17:12-18.

Kadagiti Kristiano. Dagiti Kristiano kasapulan met a makidangadangda kadagiti rebelioso a tattao. Nangipadto ni apostol Pablo iti apostasia, wenno panagrebelde, iti tengnga dagiti agkunkuna a Kristiano (2Te 2:3), ket idi panawenna, addan dagiti apostata. (1Ti 1:19, 20; 2Ti 2:16-19) Nagsurat ni adalan a Judas maipapan kadagidiay agsasao a sibabassawang “kadagidiay nadayag” iti kongregasion Kristiano. Yantangay sigurado ti pannakadadael ti kakasta a rebelioso a tattao, tinukoy ni Judas dayta a pannakadadael a kasla napasamaken, a kunkunana: “Nadadaelda iti managalsa [wenno, rebelioso] a sasao ni Kore!”​—Jud 8, 11; kitaenyo ti APOSTASIA.

Umiso ti agpasakup iti autoridad ti gobierno. Imbes nga agrebeldeda, dagidiay agtartarigagay a makagun-od iti anamong ti Dios kas paspasurot ni Kristo nakalikaguman nga agtulnogda kadagidiay mangidadaulo iti uneg ti kongregasion (Heb 13:17) ken kadagiti autoridad ti gobierno iti ruar ti kongregasion. (Tit 3:1, 2) Ti panagrebelde kadagiti sekular nga autoridad ti gobierno ket panagrebelde iti Dios, ta dagitoy nga autoridad addada babaen ti pammalubos ti Dios ken pagayatanna nga agpasakup kadakuada dagiti Kristiano agingga a ti kalkalikagumanda saan a maibusor iti lintegna.​—Ro 13:1-7; Ara 5:29.