SABETAI

[[Nayanak iti] Sabbath].

Maysa a Levita a nagbiag kalpasan ti pannakaidestiero. Kastoy ti mabasa iti teksto iti Esdras 10:15: “Nupay kasta, da met laeng Jonatan nga anak ni Asael ken Jazias nga anak ni Ticva timmakderda a maibusor iti daytoy, ket da Mesullam ken Sabetai a Levita isuda dagidiay nangtulong kadakuada.” Daytoy a bersikulo mabalin a tarusan a timmulong ni Sabetai kadagidiay nangsupiat iti singasing ni Esdras a mapagtalaw ti ganggannaet nga assawa a babbai nga innala ti sumagmamano nga Israelita. Wenno mabalin a kaipapananna a nakiraman a simmupiat iti pamay-an nga inrekomenda ti kongregasion tapno marisut dayta a banag. Ipamatmat ti sabali pay a posible a patarus nga isu timmulong kadagidiay nangtaming iti dayta a kasasaad kas pannakabagi dagiti umili. Mabalin a mapasingkedan daytoy a naud-udi a panangmatmat no ti Sabetai a nadakamat ditoy ket isu met laeng ti tao a nainaganan iti Nehemias 8:5-7; 11:1, 2, 15, 16 a timmulong ken Esdras iti publiko a pannakaibasa ti Linteg ken nagnaed idiay Jerusalem kalpasan a naibangon manen ti pader.