SAFAN

[Koneho iti Kabatuan].

Anak ni Azalias ken maysa a sekretario ti ari. Idi 642 K.K.P., imbaon ni Ari Josias ni Safan ken ti dua a sabsabali pay nga opisial tapno itedda ken Hilkias a nangato a padi dagiti pammilin maipapan iti pannakatarimaan ti templo. Iti daytoy a pasamak, inyawat ni Hilkias ken Safan “ti mismo a libro ti linteg,” nalabit ti mismo nga orihinal, a nabiit pay a nasarakan iti templo. Kalpasan unay ti panangibasa ni Safan iti maysa a paset ti Linteg ken Josias, ti ari imbaonna ni Safan ken ti anakna a ni Ahicam, agraman ti sabsabali pay, kas mangibagi a grupo tapno imtuodenda ti panggep ni Jehova maipaay iti Juda. Napanda iti mammadto a babai a ni Hulda sada impakaammo iti ari maipapan iti padto ni Jehova a dumteng ti pannakadadael, ngem saan a bayat ti panagturay ni Josias.​—2Ar 22:3-20; 2Cr 34:8-28.

Ti annak ni Safan a da Ahicam (Jer 26:24), Elasa (Jer 29:1-3), ken Gemarias (Jer 36:10-12, 25) ket nabatad nga intandudoda ti pudno a panagdaydayaw. Ngem saan nga intandudo dayta ni Jaazanias nga anakna. (Eze 8:10, 11) Ti apoko ni Safan a ni Gedalias ket isu ti managbuteng-Dios a gobernador a nadutokan kalpasan ti pannakarba ti Jerusalem.​—2Ar 25:22; Jer 39:14.