SUPLAD

Maysa nga alikamen a pagakup nga atiddog ti putanna. Dagiti gambang a suplad ti naaramat idi iti tabernakulo tapno maikkat ti dapdapo iti altar ti daton a mapuoran. (Ex 27:1-3; 38:3; Nu 4:14) Kastoy met laeng ti nakausaran dagiti gambang a suplad nga inaramid ti trabahador a Hebreo a taga Fenicia a ni Hiram agpaay iti templo nga imbangon ni Solomon. (1Ar 7:13, 14, 40, 45) Karaman dagitoy kadagiti alikamen ti templo nga impanaw dagiti Babilonio idi 607 K.K.P.​—2Ar 25:8, 14; Jer 52:18.

Naaramat idi dagiti suplad, a nalabit naaramid iti kayo, a pagtaep iti bukbukel. (Isa 30:24) Ti akaba a suplad a pagtaep ket naaramat iti pagirikan tapno maakup ti nairik a bukbukel. Naaramat met dagita a pangipallangatok iti bukbukel a maisuba iti angin tapno maipalais ti rugit, kas iti taep, ngem agtinnag ti bukbukel iti pagirikan. Naimpadtuan a dineskribir ni Juan a Manangbautisar nga adda piguratibo a suplad a pagtaep iti ima ti Mesias, nga usarenna a mangisina iti simboliko a ‘trigo’ manipud iti “taep.”​—Mt 3:1, 12; kitaenyo ti PANAGTAEP.