SISERA
1. Ti panguluen ti buyot iti babaen ti Canaanita nga Ari Jabin. Nagnaed ni Sisera idiay Haroset imbes nga idiay Hasor a siudad ni Jabin, ket ad-adda a nadakamat iti salaysay ngem ken Ari Jabin. Sumagmamano a tiempo kalpasan ti panangduprak ni Ukom Ehud iti panangituray dagiti Moabita, inrurumen da Sisera ken Jabin ti Israel iti uneg ti 20 a tawen.—Uk 4:1-3; 1Sm 12:9.
Idi nadamag ni Sisera nga inurnong da Debora ken Barak dagiti Israelita tapno makirupakda kenkuana, inummongna met dagiti puersana, agraman ti 900 a karuahena nga addaan panabas a landok, ket simmaranget iti Israel idiay naapres a ginget ti Kison. Ngem nakirupak ni Jehova maibusor ken Sisera ket riniribukna ti intero a buyotna, a nagbanag iti naan-anay a pannakaabakda.—Uk 4:7, 12-16, 23; 5:20, 21; Sal 83:9.
Nailutlot dagiti karuahena (idiligyo ti Uk 5:21), ket nagtalaw a nagnagna ni Sisera agingga a nakagteng iti tolda ni Jael, ti asawa ni Heber a Keneo, nga addaan pannakikappia ken Jabin. Inawisna a sumrek ni Sisera iti uneg. Yantangay napaksuyan ni Sisera iti gubat ken iti panagtalawna, inkeddengna ti aginana ta impapanna a natalged iti tolda ni Jael. Nangted ni Jael iti gatas nga inumen ni Sisera, ket kiniddaw ni Sisera nga agbantay ni Jael. Idi nargaanen ti turogna, nagar-arudok nga immasideg kenkuana ni Jael ket nangipalok iti pasok ti tolda kadagiti pispis ni Sisera nga uray la simmalput iti daga. Idi dimteng ni Barak, impakita kenkuana ni Jael ti napasagen a kabusor. (Uk 4:9, 17-22; 5:25-27) Awan mamaayna a nagur-uray ti ina ni Sisera ken ti sangakabbalayanna maipaay iti panagsublina nga awitna ti adu a samsam.—Uk 5:28-30.
2. Ti inapo ti maysa a pamilia dagiti Netineo a nagsubli idiay Jerusalem a nakikuyog ken Zorobabel idi 537 K.K.P. (Esd 2:1, 2, 43, 53; Ne 7:55) Dagiti kautibo iti gubat ket karaman kadagiti Netineo, ket nupay mabalin a naala ti dadduma kadakuada idi naabak ni Sisera (Num. 1) ken nalabit nagbalinda nga ad-adipen iti templo, awan ti panggapuan nga ipapan a dagiti Netineo a nagsubli manipud Babilonia ket kaputotan ti Sisera idi tiempo ni Barak.