LAWWALAWWA
[Heb., ʽak·ka·vishʹ].
Bassit a parsua a walo ti sakana ken awanan payak; sigun iti istrikto a pannakaklasipikar dayta iti biolohia, saan nga insekto no di ket maysa nga arachnid.
Ti kaaduan a lawwalawwa ket agaramid kadagiti saput nga aramatenda a pangtiliw iti biktimada. Gagangay nga addaan dagiti lawwalawwa iti tallo a paris ti spinneret, wenno pagtaudan ti saput, a masarakan iti baba ti makinlikud a paset ti tianda. Naikamang dagitoy kadagiti glandula ti seda iti uneg ti bagida babaen ti adu a bassiusit a tubo. No ti likido a seda ket maiparuar kadagiti spinneret, tumangken ken rummuar dayta kas nalami a linabag ti seda. No pagaassidegen ti lawwalawwa dagiti spinneret-na, makapataud iti maysa a napuskol a linabag. Ngem no pagaadaywenna dagita, makapataud iti adu a napipino a linabag.
Nadumaduma ti langa ti saput (wenno, balay) ti tunggal kita ti lawwalawwa, ket napintas ti pannakasukog ken komplikado ti disenio dagita. Kadagiti linabag a seda, adda dagiti naikabil a sangkatedted a pigket nga agpapada ti kaaddayoda, a pinataud met laeng ti lawwalawwa. Kalpasan a makaikabil ti lawwalawwa iti maysa a linabag iti nagbaetan ti dua a rayos ken maikkanna dayta iti pigket, bennatenna ti linabag ket kalpasanna dagus a palusposanna nga agsubli. Kas resulta, agpapada ti kaaddayo dagiti babassit a tedted ti pigket. Ti napigket a linabag ket agserbi a pangsilo ti lawwalawwa iti biktimaenna.
Iti mamindua a panagparang ti “lawwalawwa” iti Kasuratan, nadakamat dayta kadagiti piguratibo a kasasaad. Iti panagsaona ken Job, tinukoy ni Bildad a ti maysa nga apostata ket kas iti tao nga agtaltalek wenno agsadsadag iti “balay ti lawwalawwa,” wenno saput, maysa a nakakapkapuy a banag a saan a makabael a mamagtalinaed iti panagtakderna. (Job 8:14, 15) Ti makadangran ken naranggas nga ar-aramid dagiti di matalek nga Israelita ket naipadis iti pananglaga iti saput ti lawwalawwa. Nupay kasta, dagitoy a di matalek saanda a mabalin nga abbongan ti bagbagida babaen iti ar-aramidda, no kasano a saan a maikanatad a pagkawes ti maysa a saput.—Isa 59:5, 6.