MANAGSIMISIM
Tao nga agala iti impormasion babaen iti nalimed a panagpaliiw. Idi 1512 K.K.P., nangibaon ni Moises manipud nagpakarsuan ti Israel idiay Let-ang ti Paran iti 12 a panguluen (a mangibagi iti amin a tribu malaksid iti Levi) tapno sukimatenda ti daga ti Canaan. Impalubos daytoy ni Jehova gapu iti kiddaw dagiti Israelita, a nagkuna: “Mangibaontayo iti lallaki nga umun-una kadatayo tapno sukimatenda ti daga maipaay kadatayo ket iyegandatayo iti damag maipapan iti dalan a sumang-atantayo ken kadagiti siudad nga umayantayto.” (De 1:22, 23) Mabalin a nagsisinada a sagdudua ti nagkuyog, sada sinursor ti intero a daga agingga iti amianan iti “seserkan ti Hamat” ken iti laud nga agturong iti baybay. (Nu 13:21; kitaenyo ti HAMAT.) Idi nagsublidan, nupay bigbigenda amin a ti daga ket pudno a “pagay-ayusan ti gatas ken diro,” sangapulo kadagiti managsimisim ti nangipaay iti ballikug a damag a namagbuteng kadagiti Israelita. Da Josue ken Caleb laeng ti nangparegta kadagiti Israelita a sumrekda iti daga ken tagikuaenda dayta. Gapu iti kaawan pammati ti Israel ta naimpluensiaanda iti dakes a damag, inkeddeng ti Dios nga amin a lallaki a 20 ti tawenna nga agpangato ket matay iti let-ang iti las-ud ti napaut a periodo nga 40 a tawen a panagallaalla. Saan a karaman da Josue ken Caleb, kasta met ti tribu ni Levi.—Nu 13:1-33; 14:6-38; De 1:24-40.
Idi 1473 K.K.P., nangibaon ni Josue iti dua a managsimisim a bumallasiw iti Jordan tapno simisimenda ti Jerico. Dagiti managsimisim ket tinulongan ni Rahab a balangkantis, ket naispal ni Rahab agraman ti sangakabbalayanna idi narba ti Jerico. (Jos 2:1-24; 6:1, 22-25; Heb 11:31) Ti dadduma pay a pagarigan iti panagsimisim ket nadakamat iti Uk-ukom 1:22-26; 18:1-10, 14, 17; 1 Samuel 26:4. Dagiti mensahero ni David a naibaon ken Ari Hanun ti Ammon ket naakusar kas managsimisim isu a natratoda iti di nasayaat. (2Sm 10:1-7) Nangibaon ni Absalom kadagiti managsimisim iti intero nga Israel, saan a tapno mangala iti impormasion maipaay iti pannakikumplotna maibusor ken David no di ket kangrunaanna a tapno manggun-od iti suporta iti panggepna a panagrebelde.—2Sm 15:10-12.
Nagsurat ni apostol Pablo maipapan iti isasarungkarna idiay Jerusalem a kaduana da Bernabe ken Tito, a dinakamatna nga iti daydi a tiempo adda dagiti “sinankakabsat a naiserrek a siuulimek, a simrek a sililimed tapno siimenda ti wayawayami nga adda kadakami a maikaykaysa ken Kristo Jesus.”—Ga 2:1-5.