UGSA, KALAKIAN NGA

[Heb., ʼai·yalʹ].

Ti tallo a kita ti ugsa a katutubo idi iti Palestina ket ti red deer (Cervus elaphus), fallow deer (Dama mesopotamica), ken ti roe deer (Capreolus capreolus).

Sigun iti Linteg, yantangay ti kalakian nga ugsa ket managngatingat ken nagpisi ti kukona, mabalin a pagtaraon dayta no maiparukpok ti darana iti daga a kas met iti dadduma pay nga animal. (De 12:15, 16, 22, 23; 14:4-6; 15:22, 23) Ti lasag ti kalakian nga ugsa ket karaman kadagiti karne a naidasar iti lamisaan ni Ari Solomon.​—1Ar 4:22, 23.

Ti dadduma pay a pannakatukoy ti kalakian nga ugsa iti Kasuratan ket piguratibo. Ti Sulamita impadisna ti pastor a kaayan-ayatna iti maysa nga urbon a kalakian nga ugsa ket imparipiripna ti kinapartak daytoy nga animal. (Sol 2:9, 17; 8:14) Ti kinalaing ti kalakian nga ugsa a kumalay-at kadagiti napasdok a disso ket naaramat a mangyilustrar iti naan-anay a pannakapaimbag dagiti pilay a tattao. (Isa 35:6; idiligyo ti Heb 12:12, 13.) Idi a dagiti prinsipe ti Sion ket laklakuben ti Babilonia, nadakamat a kaslada kadagiti kalakian nga ugsa nga agkakapsut ken saanen a makataray gapu iti kaawan ti taraon.​—Un 1:6.