NALINTEG

Maysa a kalsada idiay Damasco, Siria. (Ara 9:10, 11; LADAWAN, Tomo 2, p. 748) Idi panawen dagiti Romano, dayta ket kangrunaan a dalan nga agarup 1.5 km (1 mi) ti kaatiddogna manipud daya nga agpalaud a lumasat iti siudad. Ti makintengnga a liniana a pagnaan ti lugan ket agarup 15 m (50 pie) ti kaakabana, ken adda kolonada iti aniaman a sikiganna a pagnaan ti tao, isu a maysa dayta a nalawa a kalsada nga agarup 26 m (85 pie) ti kaakabana. Maaw-awagan pay laeng ita iti Arabiko a nagan a katupag ti sigud a naganna (Darb al-Mustaqim), nupay saanen a naan-anay a nalinteg wenno diretso, agpalaud daytoy manipud Makindaya a Ruangan ti siudad. Iti balay ti maysa a lalaki nga agnagan Judas nga adda iti igid daytoy kadaanan a kalsada ti nagyanan ni Saulo ti Tarso iti sumagmamano a tiempo kalpasan a nagparang kenkuana ti naipadayag a ni Jesu-Kristo. Iti maysa a sirmata, pinapan ni Jesus ti adalan a ni Ananias iti daytoy a pagtaengan nga adda iti asideg iti “kalsada a maawagan Nalinteg” tapno pasublienna ti panagkita ni Saulo.​—Ara 9:3-12, 17-19.