RINGGOR

Pannakisusik, pannakiriri, pannakisupiat iti sabali gapu iti ginnura. Ti maysa a Hebreo a berbo a naipatarus a “makiringgor” ket naipatarus met a “gutugoten” ken “gargarien ti bagi.” Nadakamat iti Kasuratan a ti makagapu iti ringgor ket gura (Pr 10:12), panagpungtot (Pr 15:18; 29:22), panangparparbo (Pr 16:28), panaguyaw (Pr 22:10), nakaro a panagin-inum (Pr 23:29, 30), panangpardaya (Pr 26:20), kinapangas wenno panagpannakkel, ken kaawan ti umiso a sursuro (Pr 28:25; 1Ti 6:3, 4). Ti ringgor dadaelenna ti kappia ken kinaragsak. Ti di makaay-ayo ken makapasimron nga epektona iti sabali a tao ket maulit-ulit a naitampok iti libro ti Proverbio. (Pr 19:13; 21:9, 19; 25:24; 27:15) Dagiti rinnupir iti nagbaetan ti dua a sigud a kasla agkabsat ket mabalin a nagdakkelan a lapped iti panagkappiada. “Ti kabsat a mapagsalungasingan nakarkaro ngem iti nabileg nga ili; ket adda dagiti rinnupir a kasla balunet ti pagnaedan a torre.”​—Pr 18:19.

Yantangay ti ringgor wenno rinnupir ket maysa kadagiti aramid ti lasag a kagura ni Jehova (Ga 5:19, 20; idiligyo ti Pr 6:19; Ro 1:28, 29, 32; San 3:14-16), saan a rumbeng a maaramid dayta iti kongregasion Kristiano. (Ro 13:13; 1Co 3:3; 2Co 12:20; Fil 2:3; Tit 3:9) Ti panagbalin a di mannakiringgor ket maysa kadagiti kualipikasion ti Kristiano a manangaywan. (1Ti 3:1, 3) Ngarud, ti tattao nga agtultuloy a makirinrinnupir wenno makiringringgor ket karaman kadagidiay umawat iti nakaro a panangukom ti Dios.​—Ro 2:6, 8.

Idi umuna a siglo K.P., nasken a makirinnupir ni apostol Pablo kadagiti tattao a mannakiringgor. Adda dagidiay mangidekdeklara iti naimbag a damag buyogen ti rinnupir, nalabit tapno itan-okda ti bagbagida ken tapno pakapuyenda ti autoridad ken impluensia ni Pablo. Ngem saan nga impalubos ni Pablo a daytoy ti mangikkat iti rag-ona iti pannakakitana a maikaskasaba ni Kristo.​—Fil 1:15-18.