KINASUNGIT
Ti pamunganayan a kaipapanan ti nadumaduma a sasao iti orihinal a pagsasao a mangipasimudaag iti kaipapanan ti kinasungit ket kinatangken wenno kinabileg, nangnangruna iti dakes nga anag. Masansan a nairaman ti inggagara a panagkedked nga agtungpal iti pagayatan wenno bilbilin ti Dios. (Sal 78:8; 81:12; Isa 1:23; 65:2; Jer 3:17; 5:23; 7:23-26; 11:8; 18:12; Os 4:16; Ara 7:51) Iti Kasuratan, maulit-ulit a naitampok a ti didigra dumteng kadagidiay agtultuloy iti nasungit a dana. (De 29:19, 20; Ne 9:29, 30; Pr 28:14; Isa 30:1; Jer 6:28-30; 9:13-16; 13:10; 16:12, 13; Da 5:20; Os 9:15; Zac 7:12; Ro 2:5) Kas pagarigan, ti linteg ti Dios iti Israel imbilinna a ti nasungit ken rebelioso nga anak maubor agingga a matay.—De 21:18, 20.
Iti pannakilangenna iti sangatauan, ni Jehova a Dios siaanus nga impalubosna ti agtultuloy a kaadda dagiti tattao ken nasnasion, nupay maikarida iti ipapatay. (Ge 15:16; 2Pe 3:9) Nupay ti sumagmamano a tattao nagtignayda a mayannugot iti daytoy babaen ti panangiliniada iti bagbagida nga umawat iti asi (Jos 2:8-14; 6:22, 23; 9:3-15), ti dadduma ad-adda pay a pinatangkenda ti bagbagida maibusor ken Jehova ken maibusor iti ilina. (De 2:30-33; Jos 11:19, 20) Yantangay saan a lapdan ni Jehova dagiti tattao nga agbalin a nasungit, isu naikuna a ‘bay-anna ida nga agbalin a nasubeg’ wenno ‘patangkenenna ti pusoda.’ Inton ipakatna kamaudiananna ti pammales kadagidiay nasungit, agbanag daytoy iti pannakaiparangarang ti naindaklan a pannakabalinna ken pannakaideklara ti naganna.—Idiligyo ti Ex 4:21; Jn 12:40; Ro 9:14-18.
Ti maysa a pagarigan isu ti inaramid ti Dios mainaig ken Faraon a nagkedked a mangpalubos kadagiti Israelita a pumanaw iti Egipto. Nangipagteng ni Jehova iti sangapulo a mangdadael a saplit iti daga ti Egipto. Iti tunggal gundaway a pinatangken ni Faraon ti pusona kalpasan a nagpatingga ti maysa a saplit, inaramat ni Jehova daytoy kas gundaway tapno ad-adda nga iparangarangna ti naindaklan a pannakabalinna babaen iti sabsabali pay a milagro. (Ex 7:3-5, 14–11:10) Gapuna, ti sumagmamano kadagiti Egipcio nabigbigda a ni Jehova ket Dios a masapul a pagtulnogan. Kas pagarigan, idi naipakaammo ti maikapito a saplit, uray ti sumagmamano kadagiti adipen ni Faraon siniguradoda a dagiti bukodda nga adipen ken dinguen sitatalged a nailinong sakbay a nangrugi ti mangdadael nga uraro. (Ex 9:20, 21) Ni Faraon, kalpasan a linuk-atanna dagiti Israelita, pinagbalinna manen a nasubeg ti pusona ket inummongna dagiti puersana tapno mangyegda iti pammales kadagiti Israelita. (Ex 14:8, 9; 15:9) Ngem idi kamaudiananna, ni Jehova dinadaelna ni Faraon ken ti buyotna iti Nalabaga a Baybay. (Ex 14:27, 28; Sal 136:15) Iti las-ud ti adu a tawen kalpasanna, ti nagan ti Dios naideklara kadagiti nasion ta nagsaoda maipapan iti inaramid ni Jehova kadagiti Egipcio maigapu iti kinasungitda.—Ex 18:10, 11; Jos 2:10, 11; 9:9; 1Sm 6:6.
Yantangay mangipapaay ni Jehova iti nasakbay a pammakdaar maipapan iti panangukomna maibusor kadagidiay nasungit, ti pannakaipakat dayta a panangukom saan a maikuna a gapuanan ti sabsabali pay wenno nagtaud iti naiduma a gubuayan. Babaen ken mammadto Isaias, kinuna ni Jehova kadagiti nasubeg nga Israelita: “Gapu ta pagaammok a natangkenka ket ti lengngesmo landok a binggas ket ti mugingmo gambang, imbagbagak met kenka manipud iti dayta a tiempo. Sakbay a dumteng dayta, impangngegko kenka, tapno saanmo a maikuna, ‘Inaramid ida ti bukodko nga idolo, ket imbilin ida ti bukodko a kinitikitan a ladawan ken ti bukodko a sinukog a ladawan.’”—Isa 48:4, 5; idiligyo ti Jer 44:16-23.