LING-ET
Likido a lumsot kadagiti abut ti kudil nga iparuar dagiti glandula ti ling-et ken agayus a lumasat kadagiti abut iti kudil. Ti panagbannog (kas iti kabayatan ti napagel a panagtrabaho), emosion (kas iti panagsikor), pudot, ken dadduma pay, isuda ti gagangay a pakaigapuan iti panagling-et.
Kalpasan ti panagbasolna, kinasapulan nga ikagumaan ni Adan ti agbiag manipud nailunod a daga iti ruar ti minuyongan ti Eden, nga aramidenna dayta babaen ti mangpataud iti ling-et a panagbannog iti nagtetengngaan ti sisiit ken kalkalunay. Imbaga kenkuana ni Jehova, iti kapasetna: “Iti ling-et ta rupam mangankanto iti tinapay agingga nga agsublika iti daga, ta dayta ti nakaalaam.”—Ge 3:17-19.
Bayat ti sirmata ni Ezequiel maipapan iti templo, imbaga ni Jehova a ti papadi nga agserserbi sadiay agkawesda iti kawkawes a lienso ket “awan koma ti delana a maikapet kadakuada.” Saanda a bariksan ti bagbagida iti delana wenno aniaman a “mamagling-et.” Nalabit daytoy ket tapno maliklikan ti aniaman a kinarugit a patauden ti ling-et, wenno agsipud ta ti panagling-et pagbalinenna a di makaay-ayo ti panagserbida imbes a narag-o, a ti ling-et impasimudaagna ti panagbannog wenno makapasikor a panagtrabaho, kas iti kaso ni Adan.—Eze 44:15-18.
Ni Jesus Idiay Getsemani. Maipapan ken Jesu-Kristo idi adda idiay Getsemani iti maudi a rabii ti naindagaan a biagna, kunaen ti Lucas 22:44: “Ngem idi matutuok intultuloyna ti nagkararag nga ad-adda a sipapasnek; ket ti ling-etna nagbalin a kas kadagiti tedted ti dara nga agtinnag iti daga.” Saan nga ibaga ti mannurat a ti ling-et ni Jesus aktual a nalaokan iti darana. Mabalin a mangar-aramid laeng iti panangidilig, a nalabit ipaspasimudaagna a ti ling-et ni Kristo nabukelda a kasla tedted ti dara wenno desdeskribirenna no kasano a ti panagtedted ti ling-et ni Jesus umarngi iti tumartaredted a panagayus ti dara manipud maysa a sugat. Iti sabali a bangir, mabalin a rimmuar ti dara ni Jesus babaen iti kudilna, a nailaok iti ling-etna. Ti nadara a ling-et naipadamag a timmaud kadagiti kaso ti nakaro a pakarigatan iti isip. Ti dara wenno dagiti elemento dayta sumagepsepda kadagiti di napisang a pannakadiding ti ur-urat iti kasasaad a maaw-awagan diapedesis, ket iti hematidrosis adda ti panagruar ti ling-et a naalian iti maris a dara wenno dara, wenno panagruar ti pluido ti bagi a nalaokan iti dara, iti kasta agbanag iti ‘panagling-et iti dara.’ Siempre, singasing laeng dagitoy maipapan iti mabalin a napasamak iti kaso ni Jesus.
Ti Lucas 22:43, 44 naikkat iti Vatican Manuscript No. 1209, iti Alexandrine Manuscript, iti Syriac Sinaitic a codex, ken iti naatur a pannakabasana iti Sinaitiko a Manuskrito. Nupay kasta, dagitoy a bersikulo agparangda iti orihinal a Sinaitiko a Manuskrito, iti Codex Bezae, iti Latin a Vulgate, iti Curetonian Syriac, ken iti Syriac a Peshitta.