TAANAC

Maysa a naipasngat a siudad ti Manases iti teritoria ti Isacar (Jos 17:11; 1Cr 7:29) a naituding kadagiti Cohatita a Levita. (Jos 21:20, 25) Babaen ti panangidaulo ni Josue, dagiti Israelita pinarmekda ti ari ti Taanac. (Jos 12:7, 21) Ngem dagiti Manasesita saanda a napaksiat dagiti Canaanita iti daytoy a lugar ken iti dadduma pay a siudad. Nupay kasta, napuersa a napagtrabaho dagitoy a Canaanita idi agangay. (Uk 1:27, 28) Idi tiempo ni Ukom Barak, naabak idiay Taanac dagiti puersa ni Jabin nga ari ti Hasor, nga indauluan ni Sisera a panguluen ti buyotna. (Uk 5:19) Bayat ti panagturay ni Solomon, ti siudad ket sakup ti distrito a naituding ken Baana, maysa kadagiti 12 a diputado a naparebbengan a mangipaay iti taraon iti naarian a sangakabbalayan. (1Ar 4:7, 12) Ti ebidensia ti arkeolohia manipud Taanac ken ti timmambukor a kitikit iti maysa a pader ti templo idiay Karnak ipasimudaagda a naala ni Faraon Sisac ti siudad idi rinautna ti Palestina iti maikalima a tawen ti panagturay ti anak ken suno ni Solomon a ni Rehoboam.​—2Cr 12:2-4.

Maikunkuna a ti Taanac ket isu ti Tell Taʽanakh, agarup 8 km (5 mi) iti abagatan nga abagatan-a-daya ti Megiddo ken adda iti makin-abagatan nga igid ti Tanap ti Jezrael (ʽEmeq Yizreʽel). Nagpateg ti ayan daytoy a disso ta adda dayta iti di kumurang a dua a ruta ti komersio, ti maysa ket agturong iti Tanap ti Acco ken ti sabali agturong met iti Tanap ti Saron.