TOLDA TI GIMONG

Nayawag nga agpadpada iti tolda ni Moises (Ex 33:7) ken iti sagrado a tabernakulo a naibangon idiay let-ang. (Ex 39:32, 40; 40:2, 6, 7, 22, 24, 26, 29, 30, 32, 34, 35) Ti tolda ni Moises ket nagpaay kas temporario a santuario iti sumagmamano a tiempo agingga a naibangon ti tabernakulo. Ngamin ti ulep, a mangireprepresentar iti kaadda ni Jehova, agsaad a mismo “iti” (nalabit, iti sango ti) pagserkan daytoy a tolda no sumrek ni Moises, ket ni Jehova makisao ken Moises sadiay. Naawagan dayta iti “tolda ti gimong,” nabatad a gapu ta dagiti umili kasapulan a mapanda idi sadiay tapno umumanda ken Jehova, isu nga arigna makigimong wenno makitaripnongda ken Jehova sadiay. (Ex 33:7-11) Nalawag a dayta met laeng ti rason no apay a naawagan iti “tolda ti gimong” ti sagrado a tabernakulo.​—Kitaenyo ti TABERNAKULO.