TOMAS

[manipud Aramaiko, kaipapananna ti “Singin”].

Daytoy nga apostol ni Jesu-Kristo ket naawagan “Ti Singin,” wenno Didymous. (Mt 10:3; Mr 3:18; Lu 6:15; Jn 11:16, Rbi8 ftn) Agparang nga adda dardarasudosna a mangipeksa iti rikriknana wenno mangyebkas kadagiti panagduaduana. Nupay kasta, apaman a maikkat idi dagiti panagduaduana, saanen a bumdeng ni Tomas a mangipabigbig iti patpatienna.

Idi imbaga ni Jesus nga agsubli idiay Judea tapno riingenna ni Lazaro manipud ken patay, kinuna ni Tomas: “Mapantayo met, tapno mataytayo a maikanunong kenkuana.” (Jn 11:16) Yantangay inkagumaan dagiti Judeano nga uboren ni Jesus sakbay unay daytoy (Jn 11:7, 8), nalabit ti pampanunoten idi ni Tomas ket paregtaenna ti dadduma nga adalan a kuyogenda ni Jesus nupay mabalin nga agbanag daytoy iti ipapatay a maikanunong ken Lazaro wenno ken Jesus.

Impakita ni Tomas ti managduadua a kababalinna babaen iti sungbatna iti imbaga ni Jesus a pumanaw ket mapan mangisagana iti lugar maipaay kadagiti apostol, a kinunana: “Apo, saanmi nga ammo no sadino ti papanam. Kasano ti pannakaammomi iti dalan?” (Jn 14:2-6) Umasping iti dayta, kalpasan a nangngegna ti maipapan iti panagungar ni Jesus, kinuna ni Tomas: “Malaksid no makitak kadagiti imana ti nagdalanan dagiti lansa ket maiserrekko ti ramayko iti nagdalanan dagiti lansa ken maiserrekko ti imak iti bakrangna, pudno unay a saanakto a mamati.” Walo nga aldaw kalpasanna, naaddaan ni Tomas iti gundaway a mangaramid iti daytoy idi nagparang manen ni Jesus kadagiti adalan. Ngem saan a naibaga no aktual a naarikap ni Tomas dagiti sugat iti daytoy a gundaway. Uray pay kasta, nakombinsir met laeng ket inyebkasna: “Apok ken Diosko!” Idin tinubngar ni Kristo iti naalumamay a pamay-an, a kinunana: “Naragsak dagidiay saan a makakita ket kaskasdi a mamatida.”​—Jn 20:24-29.