GINGET

Alintungogan a disso iti nagbabaetan ti rangrangkis, turturod, wenno bambantay. Umiso a ni Jehova a Dios ti mapadayawan iti pannakapataud ti topograpiko a paspaset ti daga, a pakairamanan ti adu a ginget iti dayta. (Sal 104:8) Iti Kasuratan, adda sumagmamano a paset a naawagan iti ginget laeng. (Jos 8:11; 1Sm 13:18) Ti dadduma ket “ginget a tantanap,” nababa a patad a disso iti nagbabaetan ti bambantay ken turturod. (De 11:11; kitaenyo ti TANAP.) Adda met “dagiti naapres a ginget,” a no dadduma addaan kadagiti di maab-abbatan a waig ngem masansan a pagayusan ti danum iti panagtutudo laeng. (De 8:7; kitaenyo ti NAAPRES A GINGET.) Adda dagiti patarus a mangusar iti “ginget” no ti matuktukoy ket “nababa a tanap” (Ge 14:3; 1Cr 12:15), ken “ginget” wenno “patad a daga” maipaay iti “Sefela,” ti naturod a nababa a daga iti nagbaetan ti tanap iti igid ti baybay iti Filistia ken ti kabambantayan ti makintengnga a Palestina.​—De 1:7; 1Ar 10:27.

Karaman kadagiti pagaammo a ginget a nadakamat iti Kasuratan isu ti Ginget ti Moab “iti sanguanan ti Bet-peor” (De 3:29; 34:6) ken ti Ginget ti Asin (2Sm 8:13), kasta met dagiti ginget ti Hinnom (Ne 11:30), Ifta-el (Jos 19:14), Zeboim (1Sm 13:18), ken Zefata (2Cr 14:10). Dagiti “ginget a tanap” a nailanad iti Kasuratan ramanenda dagiti ginget a tanap iti Sinar (Ge 11:2), Jerico (De 34:3), Mizpe (Jos 11:8), Libano (Jos 12:7), Ono (Ne 6:2), ken Megiddo (2Cr 35:22; Zac 12:11).

Piguratibo ken Naimpadtuan nga Usar. Ti nasipnget a ginget, wenno baw-ang, nga addaan kadagiti palab-og ken atap nga an-animal ket napeggad iti maysa nga arban, nangnangruna iti rabii, no awan ti panangaywan ti maysa a nasayaat a pastor. Umasping iti dayta, nupay naipasango iti peggad ti nadumaduma a didigra, natalged ni David yantangay ammona a ni Jehova ti Pastorna. Gapuna, mabalinna nga ideklara: “Uray no magnaak iti ginget ti napuskol a kinasipnget, saanak nga agbuteng iti dakes.”​—Sal 23:1, 4.

“Ti pammakdaar ti ginget ti sirmata” nabatad a tumukoy iti kadaanan a Jerusalem. Nupay adda iti nangato a disso, ti siudad nayarig iti maysa a “ginget” a napalikmutan iti nangatngato a bambantay.​—Isa 22:1, 5.

Nabatad a babaen iti panangwaknit iti amin a tubeng a makalapped iti panagsubli ti ilina manipud pannakaidestiero idiay Babilonia, arigna a ni Jehova ‘pinangatona ti tunggal ginget,’ ‘pinalantagna ti turturod ken bambantay,’ ket pinagbalinna a “ti likkalikkaong a daga maysa a ginget a tanap” maipaay kadakuada. (Isa 40:4) Iti dalanda, dagiti Judio a natda saanda a nagsagaba iti pannakawaw. Natungpal ti sasao ni Jehova babaen ken Isaias: “Iti rabaw dagiti kalbo a turod manglukatakto kadagiti karayan, ket iti tengnga dagiti ginget a tanap, ub-ubbog.”​—Isa 41:18; idiligyo ti Isa 35:6, 7, 10; 43:19-21; 48:20, 21.